നിയമസഭാ തിരഞ്ഞെടുപ്പിനോടനുബന്ധിച്ച് സ്ഥാനാർഥികൾ സമർപ്പിച്ച നാമനിർദേശപത്രികളുടെ സൂക്ഷ്മ പരിശോധന ഇന്ന് നടക്കും. തിരഞ്ഞെടുപ്പ് കമ്മീഷൻ പുറത്തുവിട്ട കണക്കുകൾ പ്രകാരം സംസ്ഥാനത്ത് ആകെ 2117 പത്രികകളാണ് ലഭിച്ചിട്ടുള്ളത്. ആകെ സ്ഥാനാർഥികൾ 1252 പേരാണ്.

ഈ മാസം 26-ാം തീയതിയാണ് പത്രിക പിൻവലിക്കാനുള്ള അവസാന തീയതി. വിവിധ മണ്ഡലങ്ങളിൽ വിമത സ്ഥാനാർഥികളുടെ ഇടപെടൽ ശക്തമായ സാഹചര്യത്തിൽ ഇവരെ പിന്തിരിപ്പിക്കാൻ നേതാക്കൾ സജീവ ശ്രമത്തിലാണ്. മാർച്ച് 15-ന് തിരഞ്ഞെടുപ്പ് പ്രഖ്യാപിച്ചതിന് ശേഷം ആറ് പ്രവൃത്തിദിവസങ്ങൾ മാത്രമാണ് പത്രിക സമർപ്പിക്കാൻ ഉണ്ടായിരുന്നത്. 26-ന് പിൻവലിക്കൽ അവസാനിക്കുന്നതോടെ സംസ്ഥാനത്തെ തെരഞ്ഞെടുപ്പ് ചിത്രം വ്യക്തമായിരിക്കും.

ഇനി വെറും പതിനാറ് ദിവസം മാത്രം ബാക്കിയിരിക്കെ കേരളം പോളിംഗ് ബൂത്തിലേക്ക് നീങ്ങുകയാണ്. ഇതിനിടെ മുന്നണികൾ പ്രചാരണം ഊർജിതമാക്കി.