റവന്യൂ വകുപ്പിൽ വിവിധ തസ്തികകളിലേക്കുള്ള സ്ഥലംമാറ്റത്തിന് ഓൺലൈൻ സംവിധാനം നിലവിലുണ്ടായിരിക്കെ അത് മറികടന്ന് ക്രമവിരുദ്ധമായി സ്ഥലംമാറ്റങ്ങൾ നടത്തുകയാണെന്ന് ജോയിന്റ് കൗൺസിൽ സംസ്ഥാന സെക്രട്ടേറിയറ്റ് അംഗം സി. എ. അനീഷ് ആരോപിച്ചു. കെ.ആർ.ഡി.എസ്.എ ജില്ലാ പ്രവർത്തക കൺവെൻഷൻ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

ഏറ്റവും താഴ്ന്ന വരുമാനക്കാരായ പാർട്ട്‌ടൈം ജീവനക്കാർ, ഭിന്നശേഷിക്കാർ, ഗർഭിണികൾ, ഗുരുതര രോഗബാധിതർ എന്നിവരെ ഉൾപ്പെടെ ജില്ലയുടെ ദൂരസ്ഥ പ്രദേശങ്ങളിലേക്ക് അന്യായമായി സ്ഥലംമാറ്റുന്ന നടപടികൾ അവസാനിപ്പിക്കണമെന്ന് അദ്ദേഹം ആവശ്യപ്പെട്ടു. ഭരണാനുകൂല സംഘടനകളുടെ നിയമവിരുദ്ധ ഇടപെടലുകൾക്കെതിരെയും അദ്ദേഹം വിമർശനം ഉന്നയിച്ചു.

ജില്ലാ പ്രസിഡന്റ് ആൻസ് ജോൺ അധ്യക്ഷത വഹിച്ചു. സംസ്ഥാന പ്രസിഡന്റ് എസ്. കെ. എം. ബഷീർ മുഖ്യപ്രഭാഷണം നടത്തി. സംസ്ഥാന സെക്രട്ടേറിയറ്റ് അംഗം ആർ. ബിജുമോൻ, സംസ്ഥാന കമ്മിറ്റി അംഗം എസ്. സുകുമാരൻ, നേതാക്കളായ ടി. എച്ച്. ഫൈസൽ, സുമിതമോൾ സി. എസ്. എന്നിവർ സംസാരിച്ചു. ജില്ലാ സെക്രട്ടറി ഡി. കെ. സജിമോൻ സ്വാഗതവും മേഖലാ സെക്രട്ടറി ജി. സുനീഷ് നന്ദിയും രേഖപ്പെടുത്തി.