അടിമാലി: അടിമാലി മേഖലയിൽ വെള്ളിയാഴ്ച ഉച്ചയ്ക്കുശേഷമുണ്ടായ ശക്തമായ മഴയിലും കാറ്റിലും വിവിധയിടങ്ങളിൽ മണ്ണിടിച്ചിലും മരംവീഴ്ചയും. കത്തിപ്പാറയ്ക്കും കല്ലാറിനും സമീപം ദേശീയപാതകളിലേക്ക് മണ്ണും മരങ്ങളും പാറകളും പതിച്ചതോടെ ഗതാഗതം തടസപ്പെട്ടു.

വെള്ളിയാഴ്ച വൈകിട്ട് മൂന്നരയോടെ അടിമാലി–കല്ലാർകുട്ടി റോഡിൽ കത്തിപ്പാറയ്ക്ക് സമീപമാണ് മലയുടെ ഒരുഭാഗം ഇടിഞ്ഞ് മണ്ണും മരങ്ങളും റോഡിലേക്ക് പതിച്ചത്. ഇതോടെ ഇരുവശത്തേക്കുമുള്ള വാഹനഗതാഗതം തടസപ്പെട്ടു. നാട്ടുകാരും അഗ്നിരക്ഷാസേനയും ചേർന്ന് മരം മുറിച്ചുമാറ്റുകയും മണ്ണ് നീക്കുകയും ചെയ്തതോടെ ഏകദേശം ഒരു മണിക്കൂറിനുശേഷം ഗതാഗതം പുനഃസ്ഥാപിച്ചു.

കൊച്ചി–ധനുഷ്കോടി ദേശീയപാതയിൽ കല്ലാറിന് സമീപവും വൈകിട്ടോടെ മണ്ണിടിച്ചിലുണ്ടായി. മണ്ണും പാറകളും റോഡിലേക്ക് പതിച്ചതിനെത്തുടർന്ന് മൂന്നാറിലേക്കുള്ള വാഹനഗതാഗതത്തെ ബാധിച്ചു. ഗതാഗതം നിയന്ത്രിക്കുകയും വാഹനങ്ങൾ ബദൽ മാർഗങ്ങളിലേക്ക് തിരിച്ചുവിടുകയും ചെയ്തു. കല്ലാർ രണ്ടാം മൈലിന് സമീപം നേരത്തെയുണ്ടായ പാറയിടിച്ചിലിന്റെ പശ്ചാത്തലത്തിലും പ്രദേശത്ത് അപകടസാധ്യത നിലനിൽക്കുന്നുണ്ട്.

കത്തിപ്പാറ–കല്ലാർകുട്ടി പാതയിൽ ആശങ്ക

കത്തിപ്പാറയ്ക്കും കല്ലാർകുട്ടിക്കുമിടയിലെ ദേശീയപാതയുടെ ചില ഭാഗങ്ങളിൽ മണ്ണിടിച്ചിലും മരംവീഴ്ചയും വലിയ അപകടങ്ങൾക്ക് കാരണമാകുമെന്ന ആശങ്ക ശക്തമാണ്. റോഡിന്റെ ഒരുവശത്ത് വലിയ ഗർത്തവും മറുവശത്ത് കൊക്കയുമുള്ള ഭാഗങ്ങളിൽ മണ്ണോ മരങ്ങളോ റോഡിലേക്ക് പതിച്ചാൽ വാഹനങ്ങൾ അപകടത്തിൽപ്പെടാനുള്ള സാധ്യത കൂടുതലാണ്.

ദേശീയപാതാ വികസനത്തിന്റെ ഭാഗമായി വിവിധയിടങ്ങളിൽ മണ്ണ് നീക്കംചെയ്യുന്ന ജോലികൾ നടക്കുന്നതിനാൽ മഴ ശക്തമാകുമ്പോൾ മണ്ണിടിച്ചിൽ ഭീഷണിയും വർധിക്കുന്നുണ്ട്.

മൂന്നാറിലേക്കുള്ള യാത്രക്കാർ ജാഗ്രത പാലിക്കണം

കല്ലാർ മേഖലയിലുണ്ടായ മണ്ണിടിച്ചിലിനെത്തുടർന്ന് മൂന്നാറിലേക്കുള്ള യാത്രക്കാർ ജാഗ്രത പാലിക്കണമെന്ന് അധികൃതർ നിർദേശിച്ചിട്ടുണ്ട്. യാത്ര പുറപ്പെടുന്നതിന് മുമ്പ് റോഡിലെ നിലവിലെ ഗതാഗതസ്ഥിതിയും നിയന്ത്രണങ്ങളും പരിശോധിക്കണം. മണ്ണിടിച്ചിൽ സാധ്യതയുള്ള ഭാഗങ്ങളിൽ വാഹനങ്ങൾ നിർത്തിയിടുന്നതും അനാവശ്യമായി കാത്തുനിൽക്കുന്നതും ഒഴിവാക്കണം.

അടിമാലി മേഖലയിൽ കാര്യമായ മഴ ലഭിക്കാത്ത സമയത്തും കത്തിപ്പാറ, കല്ലാർകുട്ടി, വെള്ളത്തൂവൽ, കല്ലാർ തുടങ്ങിയ പ്രദേശങ്ങളിൽ ശക്തമായ മഴ അനുഭവപ്പെട്ടതാണ് പ്രാദേശികമായി മണ്ണിടിച്ചിലിനും മരംവീഴ്ചയ്ക്കും കാരണമായത്.

മഴ തുടരുന്ന സാഹചര്യത്തിൽ മലയോര പാതകളിലൂടെ യാത്ര ചെയ്യുന്നവർ അധികൃതരുടെ നിർദേശങ്ങൾ പാലിക്കണമെന്നും അപകടസാധ്യതയുള്ള പ്രദേശങ്ങളിൽ പ്രത്യേക ജാഗ്രത പുലർത്തണമെന്നും നിർദേശമുണ്ട്.