കോട്ടയം: കോഴിക്കോട് നടക്കുന്ന സംസ്ഥാന സ്കൂൾ കായികമേളയിലെ ജേതാക്കൾക്ക് സമ്മാനിക്കുന്ന സ്വർണക്കപ്പിന് കോട്ടയം ജില്ലയിൽ ആവേശകരമായ സ്വീകരണം. തിരുവനന്തപുരത്തുനിന്ന് കഴിഞ്ഞദിവസം ആരംഭിച്ച ഘോഷയാത്ര വെള്ളിയാഴ്ച രാവിലെയാണ് ജില്ലയിൽ പ്രവേശിച്ചത്.

കോട്ടയം എം.ഡി. സെമിനാരി സ്കൂളിൽ നടന്ന ചടങ്ങിൽ ജില്ലാ പഞ്ചായത്ത് പ്രസിഡന്റ് ജോഷി ഫിലിപ്പും ജില്ലാ കളക്ടർ ചേതൻകുമാർ മീണയും ചേർന്ന് സ്വർണക്കപ്പിനെ സ്വീകരിച്ചു. വാദ്യഘോഷങ്ങളോടെയാണ് ഘോഷയാത്രയെ സ്കൂളിൽ വരവേറ്റത്.

ജില്ലാ വിദ്യാഭ്യാസ ഡെപ്യൂട്ടി ഡയറക്ടർ ഹണി ജി. അലക്സാണ്ടർ, ഉപജില്ലാ വിദ്യാഭ്യാസ ഓഫീസർമാരായ അനിൽ കെ. തോമസ്, കെ.എസ്. ബിജുമോൻ, സ്കൂൾ പ്രിൻസിപ്പൽ ഡോ. ജേക്കബ് ജോൺ, ഹെഡ്മാസ്റ്റർ തോമസ് ഏബ്രഹാം, അധ്യാപകർ, വിദ്യാർഥികൾ തുടങ്ങിയവർ പങ്കെടുത്തു.

തുടർന്ന് പാലാ സെന്റ് മേരീസ് ജി.എച്ച്.എസ്.എസിലും സ്വർണക്കപ്പിന് സ്വീകരണം നൽകി. പാലാ നഗരസഭ വൈസ് ചെയർമാൻ ബിജു മാത്യൂസ്, വിദ്യാഭ്യാസ സ്റ്റാൻഡിങ് കമ്മിറ്റി ചെയർപേഴ്സൺ ജിജി ബൈജു, എ.ഇ.ഒമാരായ ജോളിമോൾ ഐസക്, ഡോ. കെ.ആർ. ബിന്ദുജി, സ്കൂൾ പ്രിൻസിപ്പൽ സിസ്റ്റർ ജീസ മരിയ, ഹെഡ്മിസ്ട്രസ് സിസ്റ്റർ സിനി മാത്യു, വിവിധ സ്കൂളുകളിലെ പ്രധാനാധ്യാപകർ, അധ്യാപകർ, വിദ്യാർഥികൾ തുടങ്ങിയവർ ചടങ്ങിൽ സന്നിഹിതരായി.

ഇരുകേന്ദ്രങ്ങളിലും വിദ്യാർഥികളുടെ കലാപരിപാടികളും അരങ്ങേറി.