തിരുവനന്തപുരം: സംസ്ഥാന നിയമസഭ തെരഞ്ഞെടുപ്പിലെ അന്തിമ മത്സര ചിത്രം ഇന്ന് വ്യക്തമാകും. സ്ഥാനാർഥികൾക്ക് നാമനിർദേശ പത്രിക പിന്‍വലിക്കാനുള്ള സമയം ഇന്ന് വൈകിട്ട് 3 മണിക്ക് അവസാനിക്കും.

പത്രികകളുടെ സൂക്ഷ്മപരിശോധന പൂര്‍ത്തിയായ സാഹചര്യത്തിൽ വിവിധ മണ്ഡലങ്ങളിലെ മത്സരരംഗം ഏറെക്കുറെ വ്യക്തമായിട്ടുണ്ട്.

പത്രികകളുടെ സൂക്ഷ്മപരിശോധന പൂർത്തിയായതിനെ തുടർന്ന് നിലവിൽ 985 സ്ഥാനാർഥികളാണ് മത്സര രംഗത്തുള്ളത്.പിൻവലിക്കൽ സമയപരിധി കഴിഞ്ഞതോടെ ഓരോ മണ്ഡലത്തിലുമുള്ള അന്തിമ സ്ഥാനാർഥി പട്ടിക പ്രസിദ്ധീകരിക്കും.

പിന്‍വലിക്കലിന് ശേഷം സ്ഥാനാർഥികൾക്ക് തിരഞ്ഞെടുപ്പ് ചിഹ്നങ്ങൾ അനുവദിക്കുകയും ബാലറ്റ് പേപ്പർ തയ്യാറാക്കൽ ഉൾപ്പെടെയുള്ള നടപടികൾ വേഗത്തിലാക്കുകയും ചെയ്യും.ഈ ഘട്ടം കഴിഞ്ഞാൽ സംസ്ഥാനത്തെ തിരഞ്ഞെടുപ്പ് പ്രചാരണവും കൂടുതൽ ശക്തമാകും. ഏപ്രിൽ 9 നാണ് സംസ്ഥാനത്ത് വോട്ടെടുപ്പ് നടക്കുന്നത്; മേയ് 4 ന് ഫലപ്രഖ്യാപനവും നടക്കും.