സംസ്ഥാനത്ത് പാലിനും തൈരിനും ഇന്ന് മുതൽ പുതുക്കിയ നിരക്ക് പ്രാബല്യത്തിൽ വരും. പാലിന് ലീറ്ററിന് 4 രൂപയും തൈരിന് കിലോയ്ക്ക് 10 രൂപയുമാണ് വർധിപ്പിച്ചത്. മറ്റ് പാൽ ഉൽപ്പന്നങ്ങൾക്കും വരും ദിവസങ്ങളിൽ ആനുപാതികമായി വില കൂട്ടാനാണ് സാധ്യത.

ക്ഷീരകർഷകരുടെ ഉൽപ്പാദനച്ചെലവ് വർധിച്ചതും കടുത്ത വേനൽ മൂലം പാൽ ഉൽപ്പാദനം കുറഞ്ഞതുമാണ് വില വർധനയ്ക്ക് കാരണമായി മിൽമ വിശദീകരിക്കുന്നത്. വർധിപ്പിച്ച തുകയിൽ 83.75 ശതമാനം, അഥവാ ലീറ്ററിന് 3.35 രൂപ നേരിട്ട് കർഷകർക്ക് ലഭിക്കുമെന്നും അധികൃതർ അറിയിച്ചു. എന്നാൽ നിലവിലെ സാഹചര്യത്തിൽ ഈ വർധന മതിയാകില്ലെന്ന നിലപാടിലാണ് ക്ഷീരകർഷകർ.

പാൽ കവറുകളിൽ നിലവിൽ പഴയ വില തന്നെയായിരിക്കും രേഖപ്പെടുത്തിയിട്ടുള്ളത്. പുതിയ വില പ്രിന്റ് ചെയ്ത കവറുകൾ എത്താൻ ഏകദേശം ഒരു മാസം വരെ സമയമെടുക്കുമെന്നും മിൽമ അറിയിച്ചു.

പുതുക്കിയ പാൽവില

• ഡബിൾ ടോൺഡ് മിൽക് (500 മില്ലി – മിൽമ സ്മാർട്ട്)
• മഞ്ഞ കവർ – ₹27 (നിലവിൽ ₹25)
• ഹോമോജനൈസ്ഡ് ടോൺഡ് മിൽക് (525 മില്ലി)
• നീല കവർ – ₹30 (നിലവിൽ ₹28)
• മിൽമ പ്രൈഡ് (500 മില്ലി – ഹോമോജനൈസ്ഡ്)
• ഓറഞ്ച് കവർ – ₹30 (നിലവിൽ ₹28)
• മിൽമ റിച്ച് സ്റ്റാൻഡേഡൈസ്ഡ് മിൽക് (500 മില്ലി – ഹോമോജനൈസ്ഡ്)
• പച്ച കവർ – ₹32 (നിലവിൽ ₹29)
• കൗ മിൽക് (ഒരു ലീറ്റർ ബോട്ടിൽ)
• ₹75 (നിലവിൽ ₹70)

തൈരിന്റെ പുതുക്കിയ വില

• ക്ലാസിക് തൈര് (525 ഗ്രാം)
• ₹40 (നിലവിൽ ₹35)
• എലൈറ്റ് തൈര് (500 ഗ്രാം)
• ₹45 (നിലവിൽ ₹40)