സംസ്ഥാനത്തെ കോളേജുകളിലും പ്രൊഫഷണൽ വിദ്യാഭ്യാസ സ്ഥാപനങ്ങളിലും റാഗിങ് പൂർണമായും തടയാൻ 'സിദ്ധാർഥ് ആന്റി റാഗിങ് നിയമം' നടപ്പാക്കാൻ സർക്കാർ തീരുമാനിച്ചു. വയനാട് വെറ്റിനറി കോളേജിലെ വിദ്യാർത്ഥിയായിരുന്ന സിദ്ധാർഥിന്റെ സ്മരണാർത്ഥമാണ് പുതിയ നിയമത്തിന് അദ്ദേഹത്തിന്റെ പേര് നൽകുന്നത്.

റാഗിങ് സംബന്ധിച്ച പരാതികൾ വിദ്യാർത്ഥികൾക്ക് വേഗത്തിലും സുരക്ഷിതമായും അധികൃതരെ അറിയിക്കാനായി 'സിദ്ധാർഥ് ഡിസ്ട്രസ് ആപ്പ്' രൂപീകരിക്കും. പരാതികൾക്ക് അതിവേഗത്തിൽ നടപടി ഉറപ്പാക്കുന്ന സംവിധാനവും ആപ്പിൽ ഉൾപ്പെടുത്തും.

വിദ്യാഭ്യാസ സ്ഥാപനങ്ങളിൽ റാഗിങ്ങിനെതിരെ ശക്തമായ നിയമനടപടികളും പ്രതിരോധ സംവിധാനങ്ങളും ഉറപ്പാക്കുന്നതിന്റെ ഭാഗമായാണ് പുതിയ നിയമവും ഡിജിറ്റൽ പരാതിനൽകൽ സംവിധാനവും സർക്കാർ കൊണ്ടുവരുന്നത്.