തിരുവനന്തപുരം: വോട്ടർ പട്ടിക തീവ്രപരിഷ്‌കരണവുമായി (എസ്‌ഐആർ) ബന്ധപ്പെട്ട് കരട് വോട്ടർ പട്ടികയിൽ പരാതികളും രേഖകളും സമർപ്പിക്കാനുള്ള സമയം നാളെ (ജനുവരി 30) അവസാനിക്കും. സുപ്രീംകോടതി നിർദേശത്തെ തുടർന്ന് കേന്ദ്ര തെരഞ്ഞെടുപ്പ് കമ്മീഷൻ സമയപരിധി നീട്ടി നൽകുകയായിരുന്നു.

മുൻപ് ജനുവരി 22 വരെയായിരുന്നു അവസരം നൽകിയിരുന്നത്. കേരളം ഉൾപ്പെടെയുള്ള സംസ്ഥാനങ്ങളുടെ ആവശ്യം പരിഗണിച്ചാണ് സമയം നീട്ടിയത്. പട്ടികയിൽ നിന്ന് ഒഴിവാക്കപ്പെട്ടവരുടെ വിവരങ്ങൾ പഞ്ചായത്ത് ഓഫീസുകൾ പോലുള്ള പൊതുസ്ഥലങ്ങളിലും വെബ്‌സൈറ്റുകളിലും പ്രസിദ്ധീകരിക്കണമെന്നും സുപ്രീംകോടതി ഉത്തരവിട്ടിട്ടുണ്ട്.

ജനുവരി 30 വരെ മാത്രമാണ് പരാതികൾ നൽകാനുള്ള അവസരം ലഭിക്കുക എന്നതിനാൽ അർഹരായവർ ഉടൻ നടപടി സ്വീകരിക്കണമെന്ന് തെരഞ്ഞെടുപ്പ് കമ്മീഷൻ അറിയിച്ചു.