ഗവ. ട്രൈബൽ ഹയർസെക്കൻഡറി സ്കൂളിന്റെ പിൻഭാഗത്ത് ഇടിഞ്ഞുവീണ മണ്ണ് നീക്കം ചെയ്യാനുള്ള നടപടികൾ ആരംഭിച്ചു. കട്ടപ്പന നഗരസഭയിൽ നിന്ന് 30 ലക്ഷം രൂപ വകയിരുത്തിയാണ് പ്രവർത്തനം പുരോഗമിക്കുന്നത്.

കഴിഞ്ഞ പ്രളയകാലത്താണ് മണ്ണിടിഞ്ഞ് സ്കൂൾ കെട്ടിടത്തിന് ഭീഷണിയായത്. ഇതോടെ കെട്ടിടത്തിന്റെ സുരക്ഷയും ഫിറ്റ്നസ് സർട്ടിഫിക്കറ്റും സംബന്ധിച്ച് പ്രതിസന്ധി നിലനിന്നിരുന്നു.

ക്ലാസ് മുറികളുടെ പിൻവശത്ത് കല്ലും മണ്ണും വലിയ തോതിൽ കെട്ടിനിൽക്കുന്ന സ്ഥിതിയിലായിരുന്നു. ഇത് കെട്ടിടത്തിലേക്ക് ഇടിച്ചുനിൽക്കുകയും ജനലുകൾക്ക് കേടുപാടുകൾ വരുത്തുകയും ചെയ്തിരുന്നു. മണ്ണ് നീക്കം ചെയ്യുന്നതിൽ ഉണ്ടായ കാലതാമസത്തിനെതിരെ പ്രതിഷേധവും ഉയർന്നിരുന്നു.

ടെൻഡർ വിളിച്ചെങ്കിലും ആരും മുന്നോട്ട് വരാത്തതിനെ തുടർന്നാണ് വൈകിയത് എന്ന് നഗരസഭ അധികൃതർ അറിയിച്ചു. തുടർന്ന് മത്സര അടിസ്ഥാനത്തിൽ ക്വട്ടേഷൻ ക്ഷണിച്ച് ഇപ്പോൾ മണ്ണ് നീക്കം ആരംഭിച്ചതായി ചെയർപേഴ്സൺ ജോയി വെട്ടിക്കുഴി വ്യക്തമാക്കി.

മണ്ണ് നീക്കുന്നതിനൊപ്പം ഇടിഞ്ഞ ഭാഗത്ത് സംരക്ഷണഭിത്തി നിർമ്മിക്കുന്ന പ്രവർത്തനങ്ങളും പുരോഗമിക്കുകയാണെന്നും അധികൃതർ അറിയിച്ചു.