സംസ്ഥാനത്ത് വീണ്ടും വൈദ്യുതി നിയന്ത്രണം ഏർപ്പെടുത്തുന്നതായി കേരള സംസ്ഥാന വൈദ്യുതി ബോർഡ് (കെഎസ്‌ഇബി) അറിയിച്ചു. വൈകിട്ട് 6 മണി മുതൽ രാത്രി 12 മണിവരെയുള്ള സമയത്താണ് നിയന്ത്രണം നടപ്പാക്കുക. ജൂൺ 30 വരെയാണ് നിലവിലെ നിയന്ത്രണം തുടരുക.

പവർ എക്‌സ്‌ചേഞ്ചിൽ നിന്ന് ലഭിക്കുന്ന വൈദ്യുതിയുടെ ലഭ്യത കുറഞ്ഞതും സംസ്ഥാനത്ത് ആവശ്യത്തിന് മഴ ലഭിക്കാത്തതുമാണ് നിയന്ത്രണം ഏർപ്പെടുത്താൻ കാരണമായതെന്ന് കെഎസ്‌ഇബി വ്യക്തമാക്കി. എൽനിനോ പ്രതിഭാസം ശക്തമായതോടെ രാജ്യവ്യാപകമായി വൈദ്യുതി ലഭ്യതയിൽ കുറവുണ്ടായിട്ടുണ്ട്.

നിലവിൽ ആഭ്യന്തര ഉൽപാദനത്തിലൂടെയും കേന്ദ്ര വിഹിതത്തിലൂടെയും വൈദ്യുതി ലഭിക്കുന്നുണ്ടെങ്കിലും സംസ്ഥാനത്തിന്റെ ആവശ്യത്തിന് പ്രതിദിനം ഏകദേശം 900 മെഗാവാട്ട് വരെ കുറവ് നേരിടേണ്ടിവരുമെന്നാണ് കണക്കുകൂട്ടൽ. കഴിഞ്ഞ ദിവസം സംസ്ഥാനത്തെ വൈദ്യുതി ഉപഭോഗം 4900 മെഗാവാട്ട് വരെ എത്തിയിരുന്നു.

വൈദ്യുതി ക്ഷാമത്തിന്റെ പശ്ചാത്തലത്തിൽ കഴിഞ്ഞ ദിവസങ്ങളിൽ സംസ്ഥാനത്തെ ചില പ്രദേശങ്ങളിൽ നിയന്ത്രണം ഏർപ്പെടുത്തേണ്ട സാഹചര്യം ഉണ്ടായിരുന്നുവെന്നും കെഎസ്‌ഇബി അറിയിച്ചു. പുറം സംസ്ഥാനങ്ങളിൽ നിന്ന് അധിക വൈദ്യുതി വാങ്ങാൻ ശ്രമങ്ങൾ തുടരുന്നുണ്ടെങ്കിലും, വേനൽക്കാലത്ത് ഈ വൈദ്യുതി തിരിച്ചുനൽകേണ്ട ബാധ്യത ഉള്ളതിനാൽ നിലവിലെ സാഹചര്യത്തിൽ നിയന്ത്രണം അനിവാര്യമാണെന്നാണ് ബോർഡിന്റെ വിശദീകരണം.

വൈദ്യുതി ഉപഭോഗം പരമാവധി നിയന്ത്രിക്കാനും അനാവശ്യ ലൈറ്റുകളും വൈദ്യുത ഉപകരണങ്ങളും ഒഴിവാക്കാനും പൊതുജനങ്ങളോട് കെഎസ്‌ഇബി അഭ്യർഥിച്ചിട്ടുണ്ട്.