കുമളി: ഇടുക്കിയിലെ പ്രധാന വിനോദസഞ്ചാര കേന്ദ്രമായ ഒട്ടകത്തലമേട്ടിലേക്കുള്ള ആറാംമൈൽ–ഒട്ടകത്തലമേട് റോഡ് പൂർണമായും തകർന്ന നിലയിൽ തുടരുന്നു. ആറാംമൈൽ, ചക്കുപള്ളം, അണക്കര തുടങ്ങിയ പ്രദേശങ്ങളിൽ നിന്നുള്ള പ്രധാന യാത്രാമാർഗമായ ഈ റോഡ് യാത്രായോഗ്യമല്ലാത്തത് പ്രാദേശിക ജനങ്ങളെയും വിനോദസഞ്ചാരികളെയും ഒരുപോലെ ദുരിതത്തിലാഴ്ത്തുകയാണ്.

ദിവസേന നൂറുകണക്കിന് സഞ്ചാരികൾ എത്തുന്ന ഒട്ടകത്തലമേട്ടിലേക്കുള്ള റോഡിൽ വലിയ കുഴികളും പാറക്കല്ലുകളും നിറഞ്ഞതിനാൽ സാധാരണ വാഹനങ്ങൾക്ക് കടന്നുപോകാൻ കഴിയാത്ത അവസ്ഥയാണ്. ഓഫ്-റോഡ് വാഹനങ്ങൾക്ക് മാത്രമാണ് നിലവിൽ ഏറെ പ്രയാസപ്പെട്ട് ഈ വഴിയിലൂടെ സഞ്ചരിക്കാൻ കഴിയുന്നതെന്ന് നാട്ടുകാർ പറയുന്നു.

ചക്കുപള്ളം പഞ്ചായത്തിലൂടെ കടന്നുപോകുന്ന ഈ റോഡിന്റെ ശോചനീയാവസ്ഥ പ്രദേശത്തിന്റെ വിനോദസഞ്ചാര സാധ്യതകൾക്കും തിരിച്ചടിയായിരിക്കുകയാണ്. മോശം റോഡ് കാരണം പ്രദേശവാസികൾക്ക് അടിയന്തര സാഹചര്യങ്ങളിൽ പോലും വാഹനസൗകര്യം ലഭിക്കാൻ ബുദ്ധിമുട്ട് നേരിടുന്നതായും പരാതിയുണ്ട്.

വിനോദസഞ്ചാര വികസനത്തിനും പ്രദേശവാസികളുടെ ദൈനംദിന യാത്രാ സൗകര്യത്തിനും നിർണായകമായ ഈ റോഡിന്റെ പുനർനിർമാണം യുദ്ധകാലാടിസ്ഥാനത്തിൽ ആരംഭിക്കണമെന്നാണ് ശക്തമായ ആവശ്യം ഉയരുന്നത്. ഇതിനായി സർക്കാർ പ്രത്യേക ഫണ്ട് അനുവദിച്ച് എത്രയും വേഗം റോഡ് യാത്രായോഗ്യമാക്കണമെന്ന് പ്രദേശവാസികളും വിനോദസഞ്ചാരികളും ആവശ്യപ്പെട്ടു.