കുമളി: കുമളി–ആനവിലാസം–കട്ടപ്പന റൂട്ടിലെ കടമാക്കുഴിയിൽ ടോറസ് ലോറി നിയന്ത്രണം വിട്ട് മറ്റ് വാഹനങ്ങളിലിടിച്ച ശേഷം റോഡരികിലേക്ക് മറിഞ്ഞു. അപകടത്തിൽ ഈ റൂട്ടിൽ സർവീസ് നടത്തുകയായിരുന്ന കെ.എസ്.ആർ.ടി.സി. വേണാട് ബസിനും മാരുതി സുസുക്കി വാഗൺആർ കാറിനും കേടുപാടുകൾ സംഭവിച്ചു.

ഇടിയുടെ ആഘാതത്തിൽ വണ്ടിപ്പെരിയാർ രജിസ്ട്രേഷനിലുള്ള വാഗൺആർ കാറിന്റെ മുൻഭാഗം പൂർണമായും തകർന്നു.

അപകടത്തെ തുടർന്ന് ഏറെ നേരം റോഡിൽ ഗതാഗതം പൂർണമായും തടസ്സപ്പെട്ടു. പോലീസും നാട്ടുകാരും ചേർന്ന് നടത്തിയ ഇടപെടലിനെ തുടർന്ന് ഗതാഗതക്കുരുക്ക് നിയന്ത്രണവിധേയമാക്കി. എന്നാൽ അപകടത്തിൽപ്പെട്ട കെ.എസ്.ആർ.ടി.സി. ബസ് റോഡിൽ കുടുങ്ങിക്കിടന്നതിനാൽ വലിയ വാഹനങ്ങളുടെ ഗതാഗതത്തിന് ഇപ്പോഴും ബുദ്ധിമുട്ട് നേരിടുന്നതായി റിപ്പോർട്ടുണ്ട്.