ചിത്രകാരന്‍ എ. രാമചന്ദ്രൻ മ്യൂസിയം : ലോഗോ പ്രകാശനം നടന്നു
Reporter | Kerala Journal തിരുവനന്തപുരം: കൊല്ലത്തുള്ള ശ്രീനാരായണ ഗുരു സാംസ്കാരിക സമുച്ചയത്തില്‍ സ്ഥാപിതമാവുന്ന വിഖ്യാത ചിത്രകാരന്‍ എ. രാമചന്ദ്രന്‍ മ്യൂസിയത്തിന്‍റെ ലോഗോ തിരുവനന്തപുരത്ത് ടൂറിസം മന്ത്രി മുഹമ്മദ് റിയാസ് പ്രകാശനം ചെയ്തു.
എ. രാമചന്ദ്രന്‍ മ്യൂസിയം ഒക്ടോബര്‍ ആദ്യവാരം പൊതുജനങ്ങള്‍ക്ക് തുറന്ന് കൊടുക്കും. എ. രാമചന്ദ്രന്‍റെ മകനും നാസയില്‍ ശാസ്ത്രജ്ഞനുമായ രാഹുല്‍ രാമചന്ദ്രന്‍, കേരള ലളിതകലാ അക്കാദമി ചെയര്‍പേഴ്സണ്‍ മുരളി ചീരോത്ത്, സെക്രട്ടറി എബി എന്‍. ജോസഫ്, മനു സി. പുളിക്കന്‍, ശബരീലാല്‍ തുടങ്ങിയവര്‍ ചടങ്ങിന്‍റെ ഭാഗമായി പങ്കെടുത്തു.
എ. രാമചന്ദ്രന്‍റെ 'ദി സോങ്ങ് ഓഫ് ദി സിംബൂള്‍ ട്രീ'എന്ന പ്രശസ്തമായ ചിത്രത്തില്‍ നിന്നും വികസിപ്പിച്ചതാണ് ലോഗോ. പ്രകൃതിയും മനുഷ്യനും മറ്റു ജീവജാലങ്ങളുമടങ്ങുന്ന ഉദാത്തമായ ഒരു ജീവിതസങ്കല്പമാണ് ലോഗോയിലൂടെ ഉദ്ദേശിക്കുന്നത്.
അദ്ദേഹത്തിന്‍റെ തനത് ശൈലിയിലുള്ള ചിത്രങ്ങളിലെല്ലാം തന്നെ പ്രകൃതിയോടും, ജീവിതത്തോടും അടുത്തു നില്‍ക്കുന്ന കാഴ്ചയാണ് ഉള്ളത്. ഭാരതീയമായ കാഴ്ചപ്പാടാണ് അദ്ദേഹത്തിന്‍റെ എല്ലാ ചിത്രങ്ങളുടേയും പ്രത്യേകത. അതുകൊണ്ടുതന്നെ തന്നെ എ. രാമചന്ദ്രന്‍റെ ശൈലി വിളിച്ചോതുന്ന തരത്തില്‍ ലോഗോ വേറിട്ട് നില്‍ക്കുന്നു.
കൊല്ലത്തുള്ള ശ്രീനാരായണ ഗുരു സാംസ്കാരിക സമുച്ചയത്തില്‍ സ്ഥാപിതമാവുന്ന വിഖ്യാത ചിത്രകാരന്‍ എ രാമചന്ദ്രന്‍ മ്യൂസിയത്തില്‍, രാമചന്ദ്രന്‍റെ സമഗ്ര കലാ സൃഷ്ടികളാണ് പ്രദര്‍ശിപ്പിക്കുന്നത്. ചിത്രങ്ങള്‍ കൂടാതെ, അദ്ദേഹത്തിന്‍റെ പ്രശസ്തമായ ശില്പങ്ങളും, സിറാമിക്കുകളും, സ്റ്റാമ്പ് ഡിസൈനുകളും, കുട്ടികള്‍ക്കായുള്ള ബുക്കുകളും ഉണ്ട്.
ആധുനിക ശാസ്ത്രീയ രീതിയില്‍ അന്തര്‍ദേശീയ നിലവാരത്തിലാണ് മ്യൂസിയം സജ്ജീകരിച്ചിട്ടുള്ളത്. നമ്മുടെ മ്യൂസിയം സംസ്കാരത്തിന് തന്നെ ഒരു നാഴികകല്ലാവുന്നതാണിത്.
ലോകത്തില്‍ കള്‍ച്ചറല്‍ ഇന്‍ഡസ്ട്രിയക്ക് ഏറെ പ്രാധാന്യമുള്ള ഇക്കാലത്ത്, മെര്‍ച്ചന്‍റയിസിങ് അടക്കമുള്ള വിപുലമായ സൗകര്യങ്ങളാണ് മ്യൂസിയത്തില്‍ ഒരുക്കുന്നത്. മ്യൂസിയവും വിദ്യാഭ്യാസവും ഇഴ ചേര്‍ത്തു കൊണ്ടുള്ള ഒരു പുതു സംസ്കാരമാണ് ഇതിലൂടെ വിഭാവനം ചെയ്തിട്ടുള്ളത്.
