ഭക്ഷ്യ ഭദ്രതാ നിയമം: പദ്ധതി നിര്വഹണ പ്രവര്ത്തനങ്ങള് വിലയിരുത്തി
Reporter | Kerala Journal 
ദേശീയ ഭക്ഷ്യ ഭദ്രതാ നിയമത്തിന്റെ പരിധിയില് വരുന്ന വിവിധ വകുപ്പുകളുടെ ഇടുക്കി ജില്ലയിലെ പദ്ധതി നിര്വഹണ പ്രവര്ത്തനങ്ങള് സംസ്ഥാന ഭക്ഷ്യ കമ്മീഷന് അംഗം അഡ്വ. കെ.എന്. സുഗതന്റെ സാന്നിധ്യത്തില് ചേര്ന്ന ജില്ലാതല വിജിലന്സ് സമിതി യോഗത്തില് വിലയിരുത്തി. ജില്ലയിലെ ഭക്ഷ്യ ഭദ്രതാ പദ്ധതികള് പൊതുവേ മികച്ച രീതിയില് നടപ്പിലാകുന്നതായി യോഗം വിലയിരുത്തി.
പദ്ധതി നിര്വഹണം കൂടുതല് കാര്യക്ഷമമാക്കുന്നതിനുള്ള നടപടികള് ചര്ച്ച ചെയ്ത യോഗം ആവശ്യമായ നിര്ദേശങ്ങളും മുന്നോട്ടുവച്ചു. വിവിധ വകുപ്പുകളുടെ പദ്ധതി നിര്വഹണ ചുമതലയുള്ള ഉദ്യോഗസ്ഥര് കഴിഞ്ഞ മൂന്ന് മാസങ്ങളിലായി തങ്ങളുടെ വകുപ്പുകള് നടപ്പാക്കിയ ഭക്ഷ്യ ഭദ്രതാ പദ്ധതികളുടെ പ്രവര്ത്തന റിപ്പോര്ട്ടുകള് യോഗത്തില് അവതരിപ്പിച്ചു.
കളക്ടറേറ്റ് കോണ്ഫറന്സ് ഹാളില് നടന്ന യോഗത്തില് ഭക്ഷ്യ കമ്മീഷന്റെ ജില്ലാതല പരാതി പരിഹാര ഓഫീസറായ അഡീഷണല് ജില്ലാ മജിസ്ട്രേറ്റ് ഷൈജു പി. ജേക്കബ് അധ്യക്ഷത വഹിച്ചു.
ജില്ലാ സപ്ലൈ ഓഫീസര് ബൈജു കെ. ബാലന്, ഐ.സി.ഡി.എസ് ജില്ലാ പ്രോഗ്രാം ഓഫീസര് പി.ജി. മഞ്ജു, ജില്ലാ നൂണ് മീല് സൂപ്പര്വൈസര് ശ്രീകല, പൊതുപ്രവര്ത്തകന് എം.ജെ. മാത്യു, എഫ്.സി.ഐ മാനേജര് ലക്ഷ്മി എസ്. ഷേണായ് എന്നിവര് യോഗത്തില് പങ്കെടുത്തു. വിജിലന്സ് സമിതി അംഗങ്ങള്, പൊതുവിതരണ വകുപ്പ്, പൊതു വിദ്യാഭ്യാസ വകുപ്പ്, വനിതാ ശിശു വികസന വകുപ്പ്, എഫ്.സി.ഐ, സപ്ലൈക്കോ എന്നിവിടങ്ങളിലെ ഉദ്യോഗസ്ഥരും യോഗത്തില് സന്നിഹിതരായി.
