സിബിഎസ്ഇ പന്ത്രണ്ടാം ക്ലാസ് പരീക്ഷയിൽ പുനർമൂല്യനിർണയം ഒഴിവാക്കാൻ ബോർഡ് ആലോചിക്കുന്നു. ഈ വർഷം തന്നെ ഇത് നടപ്പാക്കുന്നതിനുള്ള സാധ്യതകളാണ് വിലയിരുത്തുന്നത്. മൂല്യനിർണയം പൂർണമായും ഡിജിറ്റൽ രൂപത്തിലേക്ക് മാറുന്നതിനാൽ വിലയിരുത്തൽ കൂടുതൽ കൃത്യവും കുറ്റമറ്റതുമായിരിക്കുമെന്ന് ബോർഡ് വ്യക്തമാക്കുന്നു.

പത്താം ക്ലാസ് പരീക്ഷയിൽ പുനർമൂല്യനിർണയ സംവിധാനം തുടരുമെന്നും അറിയിച്ചിട്ടുണ്ട്.

സിബിഎസ്ഇ പരീക്ഷാ കൺട്രോളർ സന്യാം ഭരദ്വാജ് ഏഷ്യാനെറ്റ് ന്യൂസിനോട് ഈ വിവരം സ്ഥിരീകരിച്ചു. മൂല്യനിർണയം പൂർണമായി ഡിജിറ്റൽ രീതിയിലേക്കാണ് മാറുന്നതെന്നും OSM സംവിധാനത്തിലൂടെയായിരിക്കും വിലയിരുത്തൽ നടക്കുകെന്നും അദ്ദേഹം പറഞ്ഞു. ഈ സംവിധാനത്തിൽ പിശക് സംഭവിക്കാൻ സാധ്യത വളരെ കുറവായതിനാലാണ് പ്ലസ് ടു പരീക്ഷയിൽ പുനർമൂല്യനിർണയം ഒഴിവാക്കുന്നത് പരിഗണിക്കുന്നതെന്ന് അദ്ദേഹം കൂട്ടിച്ചേർത്തു.