കാമാക്ഷി പഞ്ചായത്ത് കുടുംബാരോഗ്യ കേന്ദ്രത്തിന്റെ നേതൃത്വത്തില്‍ പഞ്ചായത്തിലെ ദൈവദാൻ വൃദ്ധസദനത്തില്‍ പ്രത്യേക മെഡിക്കൽ ക്യാമ്പ് സംഘടിപ്പിച്ചു. നിരാലംബരുമായും വയോധികരുമായും ഉള്ള അന്തേവാസികൾക്ക് ആശുപത്രിയിലെത്തി ചികിത്സ തേടുന്നതിനുള്ള ബുദ്ധിമുട്ട് ഒഴിവാക്കുക എന്ന ലക്ഷ്യത്തോടെയാണ് ക്യാമ്പ് സംഘടിപ്പിച്ചത്.

വിവിധ ആശുപത്രികളിലെ വിദഗ്ധ ഡോക്ടർമാരുടെ സേവനം ഉറപ്പാക്കി ആരോഗ്യപ്രവർത്തകർ ക്യാമ്പ് നടത്തുകയുണ്ടായി. കാമാക്ഷി കുടുംബാരോഗ്യകേന്ദ്രം മെഡിക്കൽ ഓഫീസർ ഡോ. ജിൻസി ജോസ്, ഇടുക്കി മെഡിക്കൽ കോളജ് ആശുപത്രിയിലെ ശ്വാസകോശ രോഗവിഭാഗം വിദഗ്ധൻ ഡോ. ജോസ്, മുരിക്കാശേരി അൽഫോൻസ ആശുപത്രിയിലെ നേത്രരോഗ വിദഗ്ധ ഡോ. ചെൽസിയ ജെയിംസ് എന്നിവർ രോഗികളെ പരിശോധിച്ചു.

രണ്ട് ദിവസങ്ങളിലായി നടന്ന ക്യാമ്പിന് കാമാക്ഷി കുടുംബാരോഗ്യകേന്ദ്രം എച്ച്‌.ഐ ഇൻചാർജ് ജിബി വർഗീസ്, പി.എച്ച്‌.എൻ ജെസി തോമസ് എന്നിവർ നേതൃത്വം നൽകി.