കട്ടപ്പന: മഴക്കാലത്തിന് മുന്നോടിയായി നഗരപരിധി ശുചീകരിക്കാൻ കട്ടപ്പന നഗരസഭ യുടെ നേതൃത്വത്തിൽ നടപ്പിലാക്കുന്ന പദ്ധതികൾക്ക് തുടക്കമായി. നഗരസഭ ചെയർപേഴ്‌സൺ ജോയി വെട്ടിക്കുഴി പരിപാടി ഉദ്ഘാടനം ചെയ്തു.

ആരോഗ്യ സ്റ്റാൻഡിംഗ് കമ്മിറ്റിയുടെ ചെയർമാൻ തോമസ് മൈക്കിൾ അധ്യക്ഷത വഹിച്ചു. വൈസ് ചെയർപേഴ്‌സൺ ലീലാമ്മ ബേബി, കൗൺസിലർ മഞ്ജു സുരേഷ്, ക്ലീൻ സിറ്റി മാനേജർ ജിൻസ് സിറിയക്ക് എന്നിവർ സന്നിഹിതരായിരുന്നു.

പാറക്കടവ് മുതൽ പുളിയന്മല വരെയുള്ള റോഡിന്റെ വശങ്ങളിൽ അടിഞ്ഞുകൂടിയ പ്ലാസ്റ്റിക് ഉൾപ്പെടെയുള്ള മാലിന്യങ്ങൾ നീക്കം ചെയ്യുന്നതോടെയാണ് ശുചീകരണ പ്രവർത്തനങ്ങൾ ആരംഭിച്ചത്. തുടർന്നായി നഗരസഭയിലെ 35 വാർഡുകളിലും ശുചീകരണം വ്യാപിപ്പിക്കുമെന്ന് അധികൃതർ അറിയിച്ചു.