മുൻ മണലൂർ എംഎൽഎയും മുതിർന്ന കോൺഗ്രസ് നേതാവുമായിരുന്ന പി. എ. മാധവൻ അന്തരിച്ചു. വാഹനാപകടത്തിൽ ഗുരുതരമായി പരിക്കേറ്റതിനെ തുടർന്ന് മാസങ്ങളായി ചികിത്സയിലായിരുന്ന അദ്ദേഹം എറണാകുളം റിനൈ മെഡിസിറ്റി ആശുപത്രിയിൽ വച്ചാണ് അന്തരിച്ചത്.

2011 മുതൽ 2016 വരെ മണലൂർ നിയോജക മണ്ഡലത്തെ പ്രതിനിധീകരിച്ച അദ്ദേഹം നിലവിൽ കെപിസിസി നിർവാഹക സമിതി അംഗമായിരുന്നു. തൃശൂർ ഡിസിസി പ്രസിഡന്റായും യൂത്ത് കോൺഗ്രസ് ജില്ലാ പ്രസിഡന്റായും പ്രവർത്തിച്ചിട്ടുണ്ട്.

2026 ഫെബ്രുവരിയിൽ തൃശൂർ മുണ്ടൂരിലെ വീടിന് സമീപം റോഡ് മുറിച്ചുകടക്കുന്നതിനിടെ പിക്കപ്പ് വാൻ ഇടിച്ചുണ്ടായ അപകടത്തിലാണ് അദ്ദേഹത്തിന് ഗുരുതരമായി പരിക്കേറ്റത്. അപകടത്തിന് പിന്നിൽ രാഷ്ട്രീയ ദുരൂഹതയുണ്ടെന്ന് ആരോപിച്ച് മകൻ പൊലീസിൽ പരാതി നൽകിയിരുന്നു. സംഭവത്തിൽ സമഗ്രമായ അന്വേഷണം വേണമെന്ന് വിവിധ രാഷ്ട്രീയ നേതാക്കളും ആവശ്യപ്പെട്ടിരുന്നു.