സംസ്ഥാനത്ത് അടിയന്തര സാഹചര്യങ്ങളിൽ വൈദ്യുതി നിയന്ത്രണം ഏർപ്പെടുത്തുമ്പോൾ ഉപയോക്താക്കളെ കുറഞ്ഞത് ഒരു മണിക്കൂർ മുൻപെങ്കിലും അറിയിക്കണമെന്ന് വൈദ്യുതി റെഗുലേറ്ററി കമ്മീഷൻ നിർദേശിച്ചു. വൈദ്യുതി നിയന്ത്രണവുമായി ബന്ധപ്പെട്ട വിവരങ്ങൾ പത്രം, എസ്‌എംഎസ്, ടെലിവിഷൻ, സാമൂഹിക മാധ്യമങ്ങൾ തുടങ്ങിയ മാർഗങ്ങളിലൂടെ പൊതുജനങ്ങളെ അറിയിക്കണമെന്നും കമ്മീഷൻ വ്യക്തമാക്കി.

അടിയന്തര ലോഡ് ഷെഡിങ്ങിന് വ്യക്തമായ പ്രോട്ടോക്കോൾ തയ്യാറാക്കണമെന്നും വൈദ്യുതി നിയന്ത്രണ നടപടികൾ സുതാര്യമായ രീതിയിൽ നടപ്പാക്കണമെന്നും കമ്മീഷൻ നിർദേശിച്ചു.

അതേസമയം, പീക്ക് സമയത്തെ വൈദ്യുതി ക്ഷാമം പരിഹരിക്കുന്നതിനായി ഹ്രസ്വകാല വിപണിയിൽ നിന്ന് വൈദ്യുതി വാങ്ങാനുള്ള കെ.എസ്.ഇ.ബിയുടെ കരാറുകൾക്കും കമ്മീഷൻ അംഗീകാരം നൽകി. സെപ്റ്റംബർ ഒഴികെയുള്ള മാസങ്ങളിൽ 30.832 കോടി യൂണിറ്റ് വൈദ്യുതി യൂണിറ്റിന് 9.16 രൂപ നിരക്കിൽ വാങ്ങുന്നതിനാണ് അനുമതി.

നിലവിൽ അനുവദിച്ചിരുന്ന വൈദ്യുതി വാങ്ങൽ നിരക്കിന്റെ ഇരട്ടിയോളം വരുന്നതാണ് പുതിയ നിരക്കെന്ന് കമ്മീഷൻ ചൂണ്ടിക്കാട്ടി. ഈ കരാറിലൂടെ കെ.എസ്.ഇ.ബിക്ക് ഏകദേശം 282.5 കോടി രൂപയുടെ അധിക സാമ്പത്തിക ബാധ്യത ഉണ്ടാകുമെന്നും, ഇതിന്റെ ഭാരം ഒടുവിൽ വൈദ്യുതി ഉപഭോക്താക്കളിലേക്ക് എത്താൻ സാധ്യതയുണ്ടെന്നും കമ്മീഷൻ മുന്നറിയിപ്പ് നൽകി.