മൂലമറ്റം: വൈദ്യുതി സുരക്ഷാ വാരാചരണത്തിന്റെ ഭാഗമായി മൂലമറ്റം കെ.എസ്‌.ഇ.ബി സ്വിച്ച് യാർഡിൽ അഗ്നിരക്ഷാ സേനയും കെ.എസ്‌.ഇ.ബിയും സംയുക്തമായി മോക്ക് ഡ്രിൽ നടത്തി.

സ്വിച്ച് യാർഡിന്റെ ഒരു ഭാഗത്ത് തീപിടിത്തമുണ്ടാകുകയും ആളുകൾക്ക് പരുക്കേൽക്കുകയും ചെയ്താൽ സ്വീകരിക്കേണ്ട അടിയന്തര നടപടികൾ പരിശീലിക്കുന്നതിനായാണ് മോക്ക് ഡ്രിൽ സംഘടിപ്പിച്ചത്. അഗ്നിരക്ഷാ സേനയും കെ.എസ്‌.ഇ.ബി ജീവനക്കാരും ചേർന്ന് തീ അണയ്ക്കുകയും പരുക്കേറ്റവരെ ആംബുലൻസിൽ ആശുപത്രിയിലെത്തിക്കുന്നതും പരിശീലനത്തിന്റെ ഭാഗമായി നടത്തി.

വിവിധതരം എക്സ്റ്റിംഗ്വിഷറുകൾ ഉപയോഗിച്ചുള്ള അഗ്നിശമന പരിശീലനവും ജീവനക്കാർക്ക് അഗ്നി പ്രതിരോധ മാർഗങ്ങളെക്കുറിച്ചുള്ള ബോധവൽക്കരണ ക്ലാസുകളും നടന്നു.

മൂലമറ്റം അഗ്നിരക്ഷാ നിലയം സ്റ്റേഷൻ ഓഫീസർ ടി.കെ. അബ്ദുൾ അസീസിന്റെ നേതൃത്വത്തിൽ എട്ട് സേനാംഗങ്ങളും കെ.എസ്‌.ഇ.ബി എക്സിക്യൂട്ടീവ് എൻജിനീയർമാരായ ജുമൈല, ശ്രീകുമാർ എന്നിവരുടെ നേതൃത്വത്തിൽ ഇരുപതോളം കെ.എസ്‌.ഇ.ബി ജീവനക്കാരും പരിശീലനത്തിൽ പങ്കെടുത്തു.