നെടുങ്കണ്ടം: നെടുങ്കണ്ടം ഗ്രാമപഞ്ചായത്ത്, സാമൂഹ്യനീതി വകുപ്പ്, എഴുകുംവയൽ സായംപ്രഭ എന്നിവയുടെ സംയുക്താഭിമുഖ്യത്തിൽ പ്രദേശത്തെ നൂറോളം ബി.പി.എൽ. വിഭാഗത്തിൽപ്പെട്ട വയോജനങ്ങൾക്ക് പോഷകാഹാര കിറ്റുകൾ വിതരണം ചെയ്തു.

ഗ്രാമപഞ്ചായത്ത് അംഗം ജോണി പുതിയപറമ്പിൽ അധ്യക്ഷത വഹിച്ച ചടങ്ങിൽ ഗ്രാമപഞ്ചായത്ത് പ്രസിഡന്റ് ഷിഹാബ് ഈട്ടിക്കൽ പോഷകാഹാര കിറ്റുകളുടെ വിതരണം ഉദ്ഘാടനം ചെയ്തു.

എസ്.ഇ.ബി. പ്രസിഡന്റ് സാബു മണിമലകുന്നേൽ, മർച്ചന്റ്സ് അസോസിയേഷൻ പ്രസിഡന്റ് കുഞ്ഞമ്മച്ചൻ പാറത്തറ, എം.ഡി.എസ്. പ്രസിഡന്റ് ജോർജ് അരീപ്പറമ്പിൽ, ഐ.സി.ഡി.എസ്. സൂപ്പർവൈസർ ജിഷ, വാർഡ് കൺവീനർ ബിജു പെരുമനങ്ങാട്ട്, സായംപ്രഭ ഫെസിലിറ്റേറ്റർ മെൽട്ടൺ, കെയർഗീവർ ലേഹ, മോളി പുറത്തേമഠം എന്നിവർ ആശംസകൾ അർപ്പിച്ച് സംസാരിച്ചു.

പരിപാടിയുടെ ഭാഗമായി മുണ്ടിയെരുമ പ്രാഥമിക ആരോഗ്യ കേന്ദ്രത്തിലെ ആരോഗ്യപ്രവർത്തകർ വയോജനങ്ങൾക്ക് ജീവിതശൈലി രോഗങ്ങൾ കണ്ടെത്തുന്നതിനുള്ള ആരോഗ്യപരിശോധനയും നടത്തി.

ഇടുക്കി ജില്ലയിൽ നിലവിൽ നാല് പഞ്ചായത്തുകളിലാണ് സായംപ്രഭ കേന്ദ്രങ്ങൾ പ്രവർത്തിക്കുന്നത്. വയോജനങ്ങൾക്ക് ആവശ്യമായ എല്ലാ സേവനങ്ങളും എഴുകുംവയൽ സായംപ്രഭ ഹോമിൽ ലഭ്യമാക്കുമെന്ന് ഗ്രാമപഞ്ചായത്ത് പ്രസിഡന്റ് ഷിഹാബ് ഈട്ടിക്കൽ ഉദ്ഘാടന പ്രസംഗത്തിൽ അറിയിച്ചു.പരിപാടിയുടെ ഭാഗമായി വയോജനങ്ങൾക്ക് സ്നേഹവിരുന്നും ഒരുക്കി. വയോജനങ്ങൾ അവതരിപ്പിച്ച വിവിധ കലാപരിപാടികളും ചടങ്ങിന് മാറ്റുകൂട്ടി.