ഇടവെട്ടി കുടുംബശ്രീ സി.ഡി.എസ് നേതൃത്വത്തിൽ വനിതാ വികസന കോർപ്പറേഷനിൽ നിന്ന് 53 അയൽക്കൂട്ടങ്ങൾക്കായി അനുവദിച്ച 4 കോടി രൂപയുടെ വായ്പാ വിതരണത്തിന്റെ ഉദ്ഘാടനം തെക്കുംഭാഗം കല്ലാനിക്കൽ പാരിഷ് ഹാളിൽ നടന്നു.

ഗവൺമെന്റ് ചീഫ് വിപ്പ് അപ്പു ജോൺ ജോസഫ് ഉദ്ഘാടനം നിർവഹിച്ചു. ഗ്രാമപഞ്ചായത്ത് പ്രസിഡന്റ് അമീർ മുഹമ്മദ് അധ്യക്ഷത വഹിച്ചു.

വിവിധ മേഖലകളിൽ മികച്ച നേട്ടങ്ങൾ കൈവരിച്ചവരെ ജില്ലാ പഞ്ചായത്ത് പ്രസിഡന്റ് പ്രൊഫ. ഷീല സ്റ്റീഫൻ ചടങ്ങിൽ ആദരിച്ചു. ബ്ലോക്ക് പഞ്ചായത്ത് പ്രസിഡന്റ് മുഹമ്മദ് അൻഷാദ് മുഖ്യപ്രഭാഷണം നടത്തി. വനിതാ വികസന കോർപ്പറേഷൻ എറണാകുളം റീജിയണൽ പ്രോജക്ട് ഓഫീസർ ഹരികൃഷ്ണൻ പദ്ധതി വിശദീകരിച്ചു.

സി.ഡി.എസ് ചെയർപേഴ്സൺ ബീനാ വിനോദ്, മെമ്പർ സെക്രട്ടറി അനന്തകൃഷ്ണൻ പി.ടി., വൈസ് ചെയർപേഴ്സൺ സരോജിനി സി.ബി. എന്നിവർ സംസാരിച്ചു.

ത്രിതല പഞ്ചായത്ത് ഭരണസമിതി അംഗങ്ങൾ, സി.ഡി.എസ് ഭരണസമിതി അംഗങ്ങൾ, കുടുംബശ്രീ പ്രവർത്തകർ തുടങ്ങി നിരവധി പേർ ചടങ്ങിൽ പങ്കെടുത്തു.