ഇടുക്കി: ഇടുക്കി മെഡിക്കൽ കോളജിലേക്കുള്ള റോഡുകളുടെയും കെ.എസ്.ഇ.ബി. സബ് സ്റ്റേഷന്റെയും നിർമ്മാണം ഉടൻ ആരംഭിക്കുമെന്ന് റോയി കെ. പൗലോസ് എം.എൽ.എ അറിയിച്ചു. ആരോഗ്യവകുപ്പ് മന്ത്രിയുമായി നടത്തിയ ചർച്ചയിലാണ് പദ്ധതികളിലെ തടസ്സങ്ങൾ പരിഹരിച്ചതെന്ന് അദ്ദേഹം പറഞ്ഞു.

2023-ൽ മെഡിക്കൽ കോളജിലേക്കുള്ള റോഡ് നിർമ്മാണത്തിന് 16.2 കോടി രൂപയും ക്യാമ്പസിൽ കെ.എസ്.ഇ.ബി. സബ് സ്റ്റേഷൻ സ്ഥാപിക്കാൻ 11 കോടി രൂപയും അനുവദിച്ചിരുന്നെങ്കിലും ഭരണാനുമതി ലഭിക്കാത്തതിനാൽ പ്രവൃത്തികൾ ആരംഭിച്ചിരുന്നില്ല. മന്ത്രിയുടെ ഇടപെടലിനെ തുടർന്ന് ഫണ്ട് പുനഃസ്ഥാപിക്കുകയും ഭരണാനുമതിയും സാങ്കേതികാനുമതിയും ലഭ്യമാക്കി 15 ദിവസത്തിനുള്ളിൽ ടെൻഡർ നടപടികൾ പൂർത്തിയാക്കി നിർമ്മാണം ആരംഭിക്കുമെന്നും എം.എൽ.എ അറിയിച്ചു.

നിർമാണ പുരോഗതി വിലയിരുത്തുന്നതിനായി അടുത്ത മാസം 18-ന് ആരോഗ്യവകുപ്പ് മന്ത്രി ഇടുക്കി സന്ദർശിക്കും. നിർമാണ ഏജൻസിയായ കിഡ്കോയ്ക്ക് നിലവിലുള്ള പ്രവൃത്തികൾ സമയബന്ധിതമായി പൂർത്തിയാക്കാനും പുതിയ നിർമ്മാണങ്ങൾ ഉടൻ ആരംഭിക്കാനും നിർദേശം നൽകിയിട്ടുണ്ടെന്നും അദ്ദേഹം പറഞ്ഞു.

മെഡിക്കൽ കോളജിലേക്ക് പുതിയ പ്രിൻസിപ്പൽ, സൂപ്രണ്ട്, ആവശ്യമായ ഡോക്ടർമാർ, മറ്റ് ജീവനക്കാർ എന്നിവരെ ഉടൻ നിയമിക്കുമെന്നും നിയമനം ലഭിക്കുന്നവരെ മൂന്ന് വർഷത്തിനുള്ളിൽ സ്ഥലംമാറ്റില്ലെന്നും എം.എൽ.എ വ്യക്തമാക്കി.

മെഡിക്കൽ കോളജിലേക്കുള്ള പുതിയ റോഡുകൾക്ക് എസ്റ്റിമേറ്റ് തയ്യാറാക്കാനും ഓക്സിജൻ പ്ലാന്റിലേക്കുള്ള വഴി ഒരുക്കാനും കെട്ടിടത്തിന് പിന്നിലെ മണ്ണ് നീക്കം ചെയ്യാനും അടിയന്തര നടപടി സ്വീകരിക്കും. നിർമ്മാണ പുരോഗതി വിലയിരുത്താൻ ജില്ലാ കലക്ടറുടെ അധ്യക്ഷതയിൽ പ്രത്യേക യോഗവും ചേരും.

അതേസമയം, മുൻ സർക്കാരിന്റെ കാലത്ത് നഴ്‌സിങ് കോളജിന് അനുവദിച്ച 9.5 കോടി രൂപയും ചെറുതോണി ടൗൺ വികസനത്തിനായി അനുവദിച്ച 5 കോടി രൂപയും ഉൾപ്പെടെ 18 പദ്ധതികളിലായി 35 കോടി രൂപ നഷ്ടപ്പെട്ടതായി റോയി കെ. പൗലോസ് എം.എൽ.എ ആരോപിച്ചു.