കേരള സംസ്ഥാന ശിശുക്ഷേമ സമിതിയുടെ തിരുവനന്തപുരം ആസ്ഥാനത്തെ അമ്മത്തൊട്ടിലിൽ ആയിരാമത്തെ കുഞ്ഞെത്തി. അഞ്ച് ദിവസം പ്രായമുള്ള പെൺകുഞ്ഞാണ് ഇന്ന് പുലർച്ചെ 3.30ഓടെ അമ്മത്തൊട്ടിലിൽ എത്തിയത്. കുഞ്ഞിന് 'സഹസ്ര' എന്ന പേരാണ് ശിശുക്ഷേമ സമിതി നൽകിയത്.

2002-ലെ ശിശുദിനത്തിലാണ് തിരുവനന്തപുരം ആസ്ഥാനത്ത് അമ്മത്തൊട്ടിൽ പദ്ധതി ആരംഭിച്ചത്. തുടക്കത്തിൽ വലിയ ചർച്ചകൾക്ക് വഴിവെച്ച ഈ സംരംഭം ഇന്ന് 24 വർഷം പിന്നിടുമ്പോൾ കേരളത്തിലെ 14 ജില്ലകളിലേക്കും വ്യാപിച്ചിരിക്കുകയാണ്.

ഉപേക്ഷിക്കപ്പെടുന്ന നവജാത ശിശുക്കൾക്ക് സുരക്ഷിതമായ അഭയവും സംരക്ഷണവും ഉറപ്പാക്കുക എന്ന ലക്ഷ്യത്തോടെയാണ് അമ്മത്തൊട്ടിൽ പദ്ധതി നടപ്പാക്കുന്നത്. ആയിരാമത്തെ കുഞ്ഞിന്റെ വരവ് പദ്ധതിയുടെ സാമൂഹിക പ്രസക്തി ഒരിക്കൽ കൂടി അടിവരയിടുന്നതായി ശിശുക്ഷേമ സമിതി അറിയിച്ചു.