കൊച്ചി–മധുര ദേശീയപാതയിൽ വണ്ണപ്പുറം ടൗണിനും ചീങ്കൽ സിറ്റിക്കും ഇടയിലുള്ള പാലം അടിയന്തരമായി അറ്റകുറ്റപ്പണി നടത്തി ഗതാഗതയോഗ്യമാക്കുകയോ പുനർനിർമിക്കുകയോ ചെയ്യണമെന്ന് ആവശ്യപ്പെട്ട് ബി.ജെ.പി പ്രതിഷേധ സമരം സംഘടിപ്പിച്ചു.

ദിനംപ്രതി ആയിരക്കണക്കിന് വാഹനങ്ങൾ കടന്നുപോകുന്ന ദേശീയപാതയിലെ പാലത്തിന്റെ അറ്റകുറ്റപ്പണികളോ പുനർനിർമാണമോ ഇതുവരെ പൂർത്തിയാക്കാൻ പൊതുമരാമത്ത് വകുപ്പ് തയ്യാറായിട്ടില്ലെന്ന് ബി.ജെ.പി ആരോപിച്ചു. ശക്തമായ മഴയെ തുടർന്ന് തോട്ടിലെ വെള്ളം റോഡിലേക്ക് കയറി ഒഴുകാൻ തുടങ്ങിയതോടെ ഗതാഗതം പലപ്പോഴും തടസ്സപ്പെടുന്ന സാഹചര്യമാണുള്ളത്.

കാലവർഷം ശക്തമായതോടെ പാലത്തിന്റെ സുരക്ഷയെക്കുറിച്ചുള്ള ആശങ്കയും ഉയർന്നിരിക്കുകയാണ്. പാലത്തിന്റെ ശേഷിക്കുന്ന നിർമാണപ്രവർത്തനങ്ങളും ഇതുവരെ പൂർത്തിയായിട്ടില്ലെന്നും, ഇതുവഴി കടന്നുപോകുന്ന കാൽനടയാത്രക്കാരും വാഹനയാത്രക്കാരും ഭീതിയിലാണെന്നും പ്രതിഷേധക്കാർ ചൂണ്ടിക്കാട്ടി.

പാലത്തിന്റെ നിർമാണം എത്രയും വേഗം പൂർത്തിയാക്കണമെന്ന് ആവശ്യപ്പെട്ടാണ് ഭാരതീയ ജനതാപാർട്ടി വണ്ണപ്പുറം പഞ്ചായത്ത് കമ്മിറ്റി പ്രതിഷേധം സംഘടിപ്പിച്ചത്. പഞ്ചായത്ത് കമ്മിറ്റി പ്രസിഡന്റ് വി.ആർ. സതീശന്റെ അധ്യക്ഷതയിൽ നടന്ന സമരം ബി.ജെ.പി ഇടുക്കി നോർത്ത് ജില്ലാ സെക്രട്ടറി പ്രസാദ് വണ്ണപ്പുറം ഉദ്ഘാടനം ചെയ്തു.

കെ.പി. സജീവൻ, സുരേഷ് തട്ടുപുര, ബാബു പള്ളിപ്പറമ്പ്, അനുരാജ് രാജൻ, മിനി മുരളി, ദീപ ദിനേശൻ എന്നിവർ പ്രസംഗിച്ചു.