കുമളി: തമിഴ്നാട് എക്സൈസ് ചെക്ക്പോസ്റ്റിന് സമീപം ഇലക്ട്രിക്കൽ സാധനങ്ങൾ കയറ്റിവന്ന ലോറി നിയന്ത്രണം വിട്ട് മൂന്ന് കടകളിലേക്ക് ഇടിച്ചുകയറി വൻ അപകടം. രാത്രി 1.40ഓടെയാണ് സംഭവം. ആളപായമില്ല.

കടകൾക്ക് സമീപം നിന്നിരുന്ന അയ്യപ്പഭക്തരായ തീർഥാടകർ നിമിഷങ്ങളുടെ വ്യത്യാസത്തിലാണ് അപകടത്തിൽനിന്ന് രക്ഷപ്പെട്ടത്.

തമിഴ്നാട് ഭാഗത്തുനിന്ന് ഇലക്ട്രിക്കൽ ഉപകരണങ്ങളുമായി എത്തിയ ലോറി തമിഴ്നാട് പൊലീസിന്റെയും തുടർന്ന് കേരള എക്സൈസ് വകുപ്പിന്റെയും പരിശോധനയ്ക്കായി നിർത്തിയിട്ടിരിക്കുകയായിരുന്നു. പരിശോധന പൂർത്തിയാക്കി വാഹനത്തിന് സമീപത്തേക്ക് ആളുകൾ തിരിച്ചെത്തുന്നതിനിടെ പെട്ടെന്ന് ലോറിയുടെ ബ്രേക്ക് റിലീസ് ആയതാണ് അപകടത്തിന് കാരണമായതെന്നാണ് പ്രാഥമിക വിവരം.

തുടർന്ന് മുന്നോട്ടുരുണ്ട ലോറി റോഡിന്റെ എതിർവശത്തുള്ള ചിപ്സ് കട ഉൾപ്പെടെയുള്ള മൂന്ന് കടകളിലേക്ക് ശക്തമായി ഇടിച്ചുകയറി. ആ സമയത്ത് അയ്യപ്പക്ഷേത്ര ദർശനം കഴിഞ്ഞ് മടങ്ങിയെത്തിയ നാലഞ്ച് തീർഥാടകർ റോഡരികിൽ നിൽക്കുകയായിരുന്നു. ലോറി പാഞ്ഞെത്തിയത് കണ്ട് നിമിഷങ്ങളുടെ വ്യത്യാസത്തിൽ ഇവർ മാറിനിന്നതിനാൽ വൻ ദുരന്തം ഒഴിവായി.

അപകടത്തിൽ കടകൾക്ക് ഭാഗികമായി നാശനഷ്ടമുണ്ടായി. സംഭവത്തിൽ കുമളി പൊലീസ് കേസെടുത്ത് തുടർനടപടികൾ സ്വീകരിച്ചുവരികയാണ്.