സ്വകാര്യ സ്കൂളിലെ ഓണാഘോഷത്തിനിടെ പ്ലസ് വൺ വിദ്യാർത്ഥിനിയെ പീഡിപ്പിക്കാൻ ശ്രമിച്ചെന്ന പരാതിയിൽ ആംബുലൻസ് ഡ്രൈവർക്കെതിരെ മൂന്നാർ പൊലീസ് പോക്സോ നിയമപ്രകാരം കേസെടുത്തു. മാങ്കുളം സ്വദേശിയായ പ്രതി സംഭവത്തിന് പിന്നാലെ ഒളിവിൽ പോയതായാണ് പൊലീസ് പറയുന്നത്.

സംഭവത്തിൽ കേസ് ഒതുക്കിത്തീർക്കാൻ ചില രാഷ്ട്രീയ, മത നേതാക്കൾ ഇടപെട്ട് വിദ്യാർത്ഥിനിയുടെ കുടുംബത്തിനുമേൽ സമ്മർദം ചെലുത്തിയെന്ന ആരോപണം ഉയർന്നതോടെയാണ് പ്രതിഷേധം ശക്തമായത്. വിദ്യാർത്ഥിനിയുടെ സഹപാഠികളും നാട്ടുകാരും മാങ്കുളം ടൗണിൽ മണിക്കൂറുകളോളം റോഡ് ഉപരോധിച്ചു.

തുടർന്ന് സ്ഥലത്തെത്തിയ പൊലീസ് ഉദ്യോഗസ്ഥർക്ക് വിദ്യാർത്ഥികൾ മാസ് പെറ്റീഷൻ കൈമാറി. പ്രതിക്കെതിരെ കർശന നടപടി സ്വീകരിക്കുമെന്ന് പൊലീസ് ഉറപ്പ് നൽകിയതോടെയാണ് പ്രതിഷേധം അവസാനിപ്പിച്ചത്.

സംഭവത്തിൽ പ്രതിക്കായി പൊലീസ് തെരച്ചിൽ ഊർജിതമാക്കി. പരാതിയിൽ പറയുന്ന സാഹചര്യങ്ങളും സമ്മർദം ചെലുത്തിയെന്ന ആരോപണവും ഉൾപ്പെടെ പൊലീസ് പരിശോധിച്ചുവരികയാണ്.