ഫിസിയോതെറാപ്പിസ്റ്റുകൾക്കും ഒക്യുപേഷണൽ തെറാപ്പിസ്റ്റുകൾക്കും പേരിനൊപ്പം ‘ഡോക്ടർ’ (ഡോ.) എന്ന പദവി ഉപയോഗിക്കാമെന്ന് ഹൈക്കോടതി വ്യക്തമാക്കി. ‘ഡോ.’ എന്ന പദവി എംബിബിഎസ് ബിരുദധാരികൾക്ക് മാത്രമായി നിയമപരമായി സംവരണം ചെയ്തിട്ടില്ലെന്നും മെഡിക്കൽ ബിരുദമുള്ളവർക്ക് മാത്രം അവകാശപ്പെട്ടതല്ലെന്നും കോടതി നിരീക്ഷിച്ചു.

ഫിസിയോതെറാപ്പിസ്റ്റുകളും ഒക്യുപേഷണൽ തെറാപ്പിസ്റ്റുകളും ‘ഡോ.’ എന്ന പദവി ഉപയോഗിക്കുന്നത് തടയണമെന്ന് ആവശ്യപ്പെട്ട് ഇന്ത്യൻ മെഡിക്കൽ അസോസിയേഷൻ (ഐഎംഎ) സമർപ്പിച്ച ഹർജി തള്ളിക്കൊണ്ടാണ് ഹൈക്കോടതിയുടെ ഉത്തരവ്.

സംസ്ഥാനത്ത് ഫിസിയോതെറാപ്പിസ്റ്റുകളും ഒക്യുപേഷണൽ തെറാപ്പിസ്റ്റുകളും വ്യാപകമായി ‘ഡോ.’ എന്ന പേരിൽ ചികിത്സ നടത്തുന്നതായും, അവർക്കു ചികിത്സ നടത്താൻ അധികാരമില്ലെന്നും അവർ വെറും സഹായികൾ മാത്രമാണെന്നുമാണ് ഐഎംഎ ഹർജിയിൽ ചൂണ്ടിക്കാണിച്ചിരുന്നത്. എന്നാൽ, ഇക്കാര്യം അംഗീകരിക്കാനാകില്ലെന്ന് വ്യക്തമാക്കിയ കോടതി, ഫിസിയോതെറാപ്പിസ്റ്റുകൾക്കും ഒക്യുപേഷണൽ തെറാപ്പിസ്റ്റുകൾക്കും രോഗനിർണയത്തിനും ചികിത്സാ സഹായത്തിനും അധികാരമുണ്ടെന്നും വ്യക്തമാക്കി.