കേന്ദ്ര ഉപരിതല ഗതാഗത മന്ത്രാലയം ഇടുക്കി ലോക്സഭാ മണ്ഡലത്തിൽ സെൻട്രൽ റോഡ് ഇൻഫ്രാസ്ട്രക്ചർ ഫണ്ട് (CRIF) പദ്ധതിയിൽ ഉൾപ്പെടുത്തി കാഞ്ഞാർ–പുള്ളിക്കാനം റോഡിന് 34 കോടി രൂപ അനുവദിച്ചതായി ഡീൻ കുര്യാക്കോസ് എംപി അറിയിച്ചു.

ടൂറിസം മേഖലയുടെ പ്രാധാന്യം കണക്കിലെടുത്താണ് പദ്ധതിക്ക് അംഗീകാരം ലഭിച്ചതെന്ന് എംപി വ്യക്തമാക്കി. വാഗമണ്ണിലേക്ക് തൊടുപുഴ ഭാഗത്തുനിന്ന് ഏറ്റവും കൂടുതൽ ആളുകൾക്ക് എളുപ്പത്തിൽ എത്തിച്ചേരാനുളള പ്രധാന വഴിയാണ് കാഞ്ഞാർ–പുള്ളിക്കാനം റോഡ്.

നിലവിൽ മേജർ ഡിസ്ട്രിക്‌ട് റോഡ് വിഭാഗത്തിൽ ഉൾപ്പെടുന്ന 17.5 കിലോമീറ്റർ ദൈർഘ്യമുള്ള ഈ റോഡ് ദേശീയപാത മാനദണ്ഡങ്ങൾ അനുസരിച്ച് ബി.എം.ബി.സി നിലവാരത്തിൽ നവീകരിച്ച് നിർമാണം നടത്തുമെന്നും എംപി അറിയിച്ചു.