ജില്ലാ കളക്ടറുടെ ചേമ്ബറില്‍ ചേർന്ന യോഗത്തില്‍ കളക്ടർ ദിനേശൻ ചെറുവാട്ട് രാഷ്ട്രീയ പാർട്ടി പ്രതിനിധികള്‍ക്ക് വോട്ടർ പട്ടിക കൈമാറി. 2025 നവംബർ നാല് മുതല്‍ ജില്ലയില്‍ നടന്നുകൊണ്ടിരുന്ന എസ്‌.ഐ.ആർ വിജയകരമായി പൂർത്തീകരിച്ചതായി കളക്ടർ പറഞ്ഞു. ബൂത്ത് ലെവല്‍ ഓഫീസറെ ബന്ധപ്പെട്ടോ, ഓണ്‍ലൈനായോ വോട്ടർപട്ടികയില്‍ പേര് ഉള്‍പ്പെട്ടിട്ടുണ്ടോ എന്ന് പൊതുജനങ്ങള്‍ ഉറപ്പുവരുത്തണം. വോട്ടർപട്ടിക ഓണ്‍ലൈനായി ഇലക്ഷൻ കമ്മിഷന്റെ voters.eci.gov.in എന്ന വെബ്‌സൈറ്റില്‍ പരിശോധിക്കാം.

അർഹരായ ആരുടെയെങ്കിലും പേര് വിട്ടുപോയിട്ടുണ്ടെങ്കില്‍ അക്ഷയ സെന്ററുകള്‍ മുഖേനയോ കോമണ്‍ സർവീസ് സെന്ററുകള്‍ മുഖേനയോ പേര് ചേർക്കാം. പ്ലേസ്റ്റോറില്‍ നിന്ന് വോട്ടർ ഹെല്‍പ്‌ലൈൻ ആപ്പ് ഡൗണ്‍ലോഡ് ചെയ്ത് സ്വന്തമായും പേര് ചേർക്കാവുന്നതാണെന്നും ജില്ലാ ഇലക്ഷൻ വിഭാഗം അറിയിച്ചു.

യോഗത്തില്‍ ജില്ലാ ഇലക്ഷൻ ഡെപ്യൂട്ടി കളക്ടർ സുജ വർഗീസ്, ഡെപ്യൂട്ടി കളക്ടർ അതുല്‍ വി. സ്വാമിനാഥ്, ഇടുക്കി മണ്ഡലം ഇ.ആർ.ഒ മിനി കെ തോമസ് എന്നിവർ പങ്കെടുത്തു.