നാൽപ്പതാം വെള്ളി ആചരണത്തോടനുബന്ധിച്ച് എഴുകുംവയൽ കുരിശുമലയിലേക്കുള്ള ഇടുക്കി രൂപതയുടെ കാൽനട തീർഥാടനം മാർച്ച് 26, 27 തീയതികളിലായി നടക്കും.

ഇന്ന് വൈകിട്ട് അഞ്ചിന് വാഴത്തോപ്പ് സെന്റ് ജോർജ് കത്തീഡ്രൽ പള്ളിയിൽ നിന്ന് രൂപതാധ്യക്ഷൻ മാർ ജോൺ നെല്ലിക്കുന്നേൽ നയിക്കുന്ന തീർഥാടനം ആരംഭിച്ച് രാത്രി 10.30ന് തങ്കമണിയിൽ എത്തിച്ചേരും. 27ന് പുലർച്ചെ 4ന് തങ്കമണിയിൽ നിന്ന് പുനരാരംഭിക്കുന്ന യാത്ര രാവിലെ 7.15ന് വെട്ടിക്കാമറ്റം ജംഗ്ഷനിൽ എത്തും.

പുലർച്ചെ 5ന് വെള്ളയാംകുടി, 4ന് തോപ്രാംകുടി, 6ന് നെടുങ്കണ്ടം എന്നിവിടങ്ങളിൽ നിന്ന് പുറപ്പെടുന്ന തീർഥാടകരും യാത്രയിൽ അണിനിരക്കും. തുടർന്ന് രാവിലെ 8ന് മലയടിവാരത്തിലെ കപ്പേളയിൽ പ്രാർത്ഥനയ്ക്ക് ശേഷം മലകയറൽ ആരംഭിക്കും.

രാവിലെ 9.30ന് മലമുകളിലെ തീർഥാടക പള്ളിയിൽ തക്കല രൂപതാ മെത്രാൻ മാർ ജോർജ് രാജേന്ദ്രൻയും മാർ ജോൺ നെല്ലിക്കുന്നേലും മുഖ്യകാർമികരായി കുർബാന അർപ്പിക്കും.

രാത്രികാലങ്ങളിലും മലകയറാനുള്ള ക്രമീകരണങ്ങൾ ഏർപ്പെടുത്തിയിട്ടുണ്ടെന്ന് മോൺ. ജോസ് കരിവേലിക്കൽ, ഫാ. ജിൻസ് കാരയ്ക്കാട്ട്, ഫാ. ജോസഫ് ചുനയംമാക്കൽ, ഫാ. നിർമൽ കളത്തിൽക്കാട്ടിൽ, ഷാജി മാത്യു, സുനിൽ ജോസ് എന്നിവർ അറിയിച്ചു