സംസ്ഥാന പൊലീസ് സേനയിൽ വൻതോതിലുള്ള അഴിച്ചുപണി നടത്തി സർക്കാർ. എഡിജിപി തലം മുതൽ എസ്.പി തലം വരെയുള്ള 30 മുതിർന്ന ഐപിഎസ് ഉദ്യോഗസ്ഥരെയാണ് വിവിധ സ്ഥാനങ്ങളിലേക്ക് മാറ്റി നിയമിച്ചത്.

ക്രമസമാധാന ചുമതലയുള്ള പുതിയ എഡിജിപിയായി പി. വിജയനെ നിയമിച്ചു. സൈബർ സെല്ലിന്റെ അധിക ചുമതലയും അദ്ദേഹത്തിന് നൽകി. ഇന്റലിജൻസ് വിഭാഗം മേധാവിയായിരുന്ന പി. വിജയനാണ് പുതിയ നിയമനം ലഭിച്ചത്. എസ്. ശ്രീജിത്തിനെ പൊലീസ് ഹെഡ്ക്വാർട്ടേഴ്സ് ചുമതലയിൽ നിന്ന് മാറ്റി ജയിൽ എഡിജിപിയായി നിയമിച്ചു.

ബൽറാം കുമാർ ഉപാധ്യായയെ ജയിൽ മേധാവി സ്ഥാനത്തുനിന്ന് മാറ്റി സായുധ പൊലീസ് ബറ്റാലിയൻ എഡിജിപിയായി നിയമിച്ചു. എച്ച്. വെങ്കിടേഷിന് ക്രൈംബ്രാഞ്ച് എഡിജിപിയായി പൂർണ ചുമതല നൽകി. ദിനേന്ദ്ര കശ്യപിനെ സായുധ പൊലീസ് ബറ്റാലിയനിൽ നിന്ന് മാറ്റി ഇന്റലിജൻസ് എഡിജിപിയായി നിയമിച്ചു.

ഹർഷിത അത്തല്ലൂരിയെ പൊലീസ് ഹെഡ്ക്വാർട്ടേഴ്സ് ഐജിയായും എസ്. ശ്യാംസുന്ദറിനെ പുതുതായി രൂപീകരിച്ച ക്രൈംബ്രാഞ്ച് എക്സ്-കേഡർ പോസ്റ്റിലെ ഐജിയായും നിയമിച്ചു. ആർ. നിശാന്തിനിയെ ഇന്റലിജൻസ് വിഭാഗം ഐജിയായും യതീഷ് ചന്ദ്രയെ എറണാകുളം റേഞ്ച് ഡിഐജിയായും നിയമിച്ചു.

തിരുവനന്തപുരം സിറ്റി പൊലീസ് കമ്മീഷണറായിരുന്ന കാർത്തിക്കിനെ തൃശൂർ റേഞ്ച് ഡിഐജിയായി മാറ്റി. തൃശൂർ റേഞ്ച് ഡിഐജിയായിരുന്ന നാരായണൻ ടിയെ കണ്ണൂർ റേഞ്ച് ഡിഐജിയായി നിയമിച്ചു. എറണാകുളം റേഞ്ച് ഡിഐജിയായിരുന്ന ഡോ. അരുള്‍ ആർ.ബി. കൃഷ്ണയെ തിരുവനന്തപുരം സിറ്റി പൊലീസ് കമ്മീഷണറായി നിയമിച്ചു.

ജില്ലാ പൊലീസ് മേധാവിമാരിലും മാറ്റം

• മെറിൻ ജോസഫ് – കോഴിക്കോട് റൂറൽ ജില്ലാ പൊലീസ് മേധാവി
• ഷൗക്കത്തലി എ.പി – കോഴിക്കോട് സിറ്റി പൊലീസ് കമ്മീഷണർ
• പ്രശാന്തൻ കാണി ബി.കെ – തിരുവനന്തപുരം റൂറൽ ജില്ലാ പൊലീസ് മേധാവി
• സാബു മാത്യു കെ.എം – കോട്ടയം ജില്ലാ പൊലീസ് മേധാവി
• ഷാജി സുഗുണൻ – കൊല്ലം റൂറൽ ജില്ലാ പൊലീസ് മേധാവി
• വിഷ്ണു പ്രദീപ് ടി.കെ – ആലപ്പുഴ ജില്ലാ പൊലീസ് മേധാവി
• അബ്ദുൽ റഷീദ് എ – പാലക്കാട് ജില്ലാ പൊലീസ് മേധാവി
• എസ്. ദേവ മനോഹർ – വയനാട് ജില്ലാ പൊലീസ് മേധാവി
• ബി. കൃഷ്ണകുമാർ – റെയിൽവേ എസ്.പി
• നിതിൻരാജ് പി – കാസർകോട് ജില്ലാ പൊലീസ് മേധാവി
• ബി.വി. വിജയ ഭാരത് റെഡ്ഡി – കണ്ണൂർ സിറ്റി പൊലീസ് കമ്മീഷണർ
• മുഹമ്മദ് നദീമുദ്ദീൻ – തൃശൂർ റൂറൽ ജില്ലാ പൊലീസ് മേധാവി
• ഉമേഷ് ഗോയൽ – കണ്ണൂർ റൂറൽ ജില്ലാ പൊലീസ് മേധാവി
• ഡോ. നസീം എ – ഇടുക്കി ജില്ലാ പൊലീസ് മേധാവി
• സി.എസ്. ഷാഹുൽ ഹമീദ് – തിരുവനന്തപുരം ക്രൈംബ്രാഞ്ച് സെൻട്രൽ യൂണിറ്റ്-1 എസ്.പി

പൊലീസ് ആസ്ഥാനത്തും ക്രൈംബ്രാഞ്ച്, ഇന്റലിജൻസ്, കോസ്റ്റൽ പൊലീസ് വിഭാഗങ്ങളിലുമടക്കം വ്യാപകമായ പുനഃസംഘടനയാണ് സർക്കാർ നടത്തിയിരിക്കുന്നത്. ഇതോടെ സംസ്ഥാനത്തെ പൊലീസ് സംവിധാനത്തിൽ നിർണായകമായ ഭരണപരമായ മാറ്റങ്ങൾക്ക് വഴിയൊരുങ്ങും.