ഇടുക്കി: ഇടുക്കി മെഡിക്കൽ കോളജിലെ ഓഫീസ് ക്ലർക്കായ തിരുവനന്തപുരം പൗഡിക്കോണം സ്വദേശി എസ്. ബിനു (33) ഹൃദയാഘാതത്തെ തുടർന്ന് മരിച്ചു. നാല് വർഷമായി ഇടുക്കി മെഡിക്കൽ കോളജിൽ ക്ലർക്കായി സേവനമനുഷ്ഠിച്ചുവരികയായിരുന്നു.

പനി ബാധിച്ചതിനെ തുടർന്ന് ഇന്നലെ രാവിലെ ബിനു ഇടുക്കി മെഡിക്കൽ കോളജ് ആശുപത്രിയിൽ ചികിത്സ തേടിയിരുന്നു. തുടർന്ന് താമസസ്ഥലത്ത് തിരിച്ചെത്തിയ ശേഷം അദ്ദേഹത്തിന് നെഞ്ചുവേദന അനുഭവപ്പെട്ടു. വിവരം ആശുപത്രിയിൽ അറിയിച്ചതിനെ തുടർന്ന് ആശുപത്രി ജീവനക്കാർ ഉടൻ സ്ഥലത്തെത്തി ബിനുവിനെ മെഡിക്കൽ കോളജ് ആശുപത്രിയിലേക്ക് കൊണ്ടുപോകുന്നതിനിടെ വഴിമധ്യേ മരണം സംഭവിക്കുകയായിരുന്നു.

മൃതദേഹം ഇടുക്കി മെഡിക്കൽ കോളജ് മോർച്ചറിയിലേക്ക് മാറ്റി. പോസ്റ്റ്മോർട്ടത്തിനുശേഷം ആശുപത്രിയിൽ പൊതുദർശനത്തിന് വയ്ക്കും. തുടർന്ന് സംസ്കാരച്ചടങ്ങുകൾക്കായി മൃതദേഹം ജന്മനാടായ തിരുവനന്തപുരം പൗഡിക്കോണത്തേക്ക് കൊണ്ടുപോകും.