കട്ടപ്പന: ഇടുക്കി–തമിഴ്നാട് അതിർത്തിയിലെ കമ്പംമെട്ട്–കമ്പം അന്തർസംസ്ഥാന പാതയിൽ ശനിയാഴ്ച മുതൽ ഭാഗികമായി ഗതാഗതം പുനരാരംഭിക്കും. രാവിലെ 6 മണി മുതൽ ബസുകൾ, ജീപ്പുകൾ, കാറുകൾ ഉൾപ്പെടെയുള്ള ചെറുവാഹനങ്ങൾക്ക് റോഡിലൂടെ യാത്രാനുമതി നൽകുമെന്ന് തമിഴ്നാട് പൊതുമരാമത്ത് വകുപ്പ് അറിയിച്ചു.

റോഡിന്റെ കോൺക്രീറ്റിങ് ജോലികളും പാലങ്ങളുടെ നിർമാണവും പുരോഗമിക്കുന്നതിനാൽ ടിപ്പർ ലോറികൾ ഉൾപ്പെടെയുള്ള ഭാരവാഹനങ്ങളുടെ ഗതാഗത നിരോധനം 20 ദിവസത്തേക്ക് കൂടി നീട്ടിയിട്ടുണ്ട്.

നിർമാണ പ്രവർത്തനങ്ങൾ സുരക്ഷിതമായി പൂർത്തിയാക്കുന്നതിനായാണ് നിയന്ത്രണങ്ങൾ തുടരുന്നതെന്ന് അധികൃതർ അറിയിച്ചു. യാത്രക്കാർ ഗതാഗത നിയന്ത്രണങ്ങൾ പാലിച്ച് സഹകരിക്കണമെന്നും പൊതുമരാമത്ത് വകുപ്പ് അറിയിച്ചു.