ചെറുതോണി: ആഗസ്റ്റ് 1 മുതൽ ചെറുതോണി ടൗണിൽ പുതിയ ഗതാഗത നിയന്ത്രണം നടപ്പാക്കുമെന്ന് വാഴത്തോപ്പ് ഗ്രാമപഞ്ചായത്ത് പ്രസിഡന്റ് ആൻസി തോമസ് അറിയിച്ചു.

ചെറുതോണിയിൽ ദിനംപ്രതി വർധിച്ചുവരുന്ന വാഹനത്തിരക്കും അതുമൂലമുണ്ടാകുന്ന ഗതാഗതക്കുരുക്കും പരിഹരിക്കുന്നതിനായി ഗ്രാമപഞ്ചായത്ത് പ്രസിഡന്റിന്റെ അധ്യക്ഷതയിൽ ചേർന്ന ട്രാഫിക് അഡ്വൈസറി കമ്മിറ്റി യോഗത്തിലാണ് തീരുമാനം.

പുതിയ ക്രമീകരണത്തിന്റെ ഭാഗമായി വാഹന പാർക്കിംഗിനായി പ്രത്യേക സ്ഥലങ്ങൾ നിശ്ചയിച്ചിട്ടുണ്ട്. ചെറുതോണി പെട്രോൾ പമ്പ് ജംഗ്ഷൻ, ജില്ലാ പഞ്ചായത്ത് പാലത്തിന് സമീപമുള്ള പഴയ ബസ് സ്റ്റാൻഡ്, ചെറുതോണി–ഇടുക്കി റോഡിന്റെ വലതുവശം, ചെറുതോണി പഴയ പാലത്തിന്റെ സൈഡിലുള്ള റോഡിന്റെ വശങ്ങൾ എന്നിവിടങ്ങളിലാണ് പാർക്കിംഗ് സൗകര്യം ഒരുക്കുന്നത്.

ഗതാഗത നിയന്ത്രണവുമായി ബന്ധപ്പെട്ട വിശദമായ മാർഗനിർദേശങ്ങളും മറ്റ് വ്യവസ്ഥകളും അടുത്ത ദിവസങ്ങളിൽ ഔദ്യോഗികമായി പ്രഖ്യാപിക്കുമെന്ന് ഗ്രാമപഞ്ചായത്ത് പ്രസിഡന്റ് അറിയിച്ചു.