ലോക പ്രകൃതി സംരക്ഷണ ദിനത്തോടനുബന്ധിച്ച് ഇരവികുളം ദേശീയോദ്യാനത്തിലെ ലക്കം മേഖലയിൽ വിപുലമായ പരിസ്ഥിതി സംരക്ഷണ പ്രവർത്തനങ്ങൾ സംഘടിപ്പിച്ചു. പാമ്പാറിന്റെ തീരത്ത് നടന്ന പരിപാടി അസിസ്റ്റന്റ് വാർഡൻ എ. നിസാം ഉദ്ഘാടനം ചെയ്തു.

ഡെപ്യൂട്ടി റേഞ്ച് ഓഫീസർ പി. രാജീവ്, എം.ജെ. ബാബു എന്നിവർ പരിസ്ഥിതി സംരക്ഷണത്തിന്റെ പ്രാധാന്യം വിശദീകരിച്ച് സന്ദേശം നൽകി. ഹരിത ജീവിതശൈലി സ്വീകരിക്കണമെന്നും, ദൈനംദിന ജീവിതത്തിൽ പരിസ്ഥിതി സൗഹൃദ പ്രവർത്തനങ്ങൾ പ്രോത്സാഹിപ്പിക്കണമെന്നും ആഹ്വാനം ചെയ്ത് വിവിധ സംഘടനകളുടെ നേതൃത്വത്തിൽ ബോധവൽക്കരണ പരിപാടികളും നടന്നു.

പരിപാടിയുടെ ഭാഗമായി ലക്കം മേഖലയിലെ മൂന്നാർ–ഉടുമൽപേട്ട റോഡരികിൽ ഉപേക്ഷിക്കപ്പെട്ട പ്ലാസ്റ്റിക് മാലിന്യങ്ങൾ ശേഖരിച്ച് നീക്കം ചെയ്തു.

ലക്കംകുടി ഇ.ഡി.സി., മൂന്നാർ മ്യൂസ്, മൂന്നാർ ബി.ആർ.സി.എസ്. എന്നിവയുടെ പ്രതിനിധികൾ പരിപാടിയിൽ പങ്കെടുത്തു. വനപാലകരായ സുമേഷ് പ്രഭു, കെ. അഭിലാഷ്, മൂന്നാർ മ്യൂസ് പ്രസിഡന്റ് ആർ. മോഹൻ, എം. സെന്തിൽകുമാർ, ആൻസൽ കൊറിയ, ഗായത്രി എന്നിവർ നേതൃത്വം നൽകി.

അതേസമയം, ലോക കടുവ ദിനാചരണത്തിന്റെ ഭാഗമായി ഇന്ന് (ജൂലൈ 29) രാവിലെ 11 മണിക്ക് മൂന്നാർ പോസ്റ്റ് ഓഫീസ് ജംഗ്ഷനിൽ വനം വകുപ്പിന്റെ ആഭിമുഖ്യത്തിൽ പ്രത്യേക പരിപാടി സംഘടിപ്പിക്കും.