ഓണം ആഘോഷങ്ങൾ അടുത്തിരിക്കെ സുരക്ഷിതമായ ഭക്ഷണം ഉറപ്പാക്കുന്നതിനായി ജില്ലാ ഭക്ഷ്യസുരക്ഷാ വകുപ്പിന്റെ നേതൃത്വത്തിൽ 'സേഫ് ഓണം' ബോധവത്കരണ പരിപാടി സംഘടിപ്പിച്ചു. ഭക്ഷ്യ ഉൽപാദന-വിതരണ രംഗത്ത് പ്രവർത്തിക്കുന്നവർക്കായാണ് പരിപാടി നടത്തിയത്.

ഇടുക്കി കാസിൽ ഹോട്ടലിൽ നടന്ന ജില്ലാ തല ഉദ്ഘാടനം റോയ് കെ. പൗലോസ് എം.എൽ.എ നിർവഹിച്ചു. ഓണക്കാലത്ത് ഭക്ഷ്യ ഉൽപാദന-വിതരണ മേഖലയിലുള്ളവരും പൊതുജനങ്ങളും ഭക്ഷ്യസുരക്ഷാ മാനദണ്ഡങ്ങൾ കർശനമായി പാലിക്കണമെന്നും, സുരക്ഷാ കാര്യങ്ങളിൽ യാതൊരു വിട്ടുവീഴ്ചയും പാടില്ലെന്നും അദ്ദേഹം പറഞ്ഞു.

വാഴത്തോപ്പ് പഞ്ചായത്ത് പ്രസിഡന്റ് ആൻസി തോമസ് അധ്യക്ഷത വഹിച്ചു. ജില്ലാ ഭക്ഷ്യസുരക്ഷാ അസിസ്റ്റന്റ് കമ്മീഷണർ ബൈജു പി. ജോസഫ് സ്വാഗതവും ഭക്ഷ്യസുരക്ഷാ ഓഫീസർ സൈജു കെ. രാമനാഥ് നന്ദിയും രേഖപ്പെടുത്തി.

ഹോട്ടൽ, റെസ്റ്റോറന്റ്, ബേക്കറി, കാറ്ററിംഗ് മേഖലകളിൽ പ്രവർത്തിക്കുന്നവർക്കായി സംഘടിപ്പിച്ച ബോധവത്കരണ ക്ലാസുകൾ ദേവികുളം ഭക്ഷ്യസുരക്ഷാ ഓഫീസർമാരായ ആൻമേരി ജോൺസൺ, സുമിൻ ജോസ് എന്നിവർ നയിച്ചു. ഓണക്കാലത്ത് സുരക്ഷിതവും ഗുണനിലവാരമുള്ളതുമായ ഭക്ഷണം പൊതുജനങ്ങൾക്ക് ലഭ്യമാക്കുക എന്ന ലക്ഷ്യത്തോടെയാണ് പരിപാടി സംഘടിപ്പിച്ചത്.