കോട്ടയം: വിദേശ സംഭാവന നിയന്ത്രണ നിയമമായ എഫ്‌സിആർഎ (FCRA) ഭേദഗതി ബിൽ പാസാക്കാനുള്ള കേന്ദ്രസർക്കാരിന്റെ നീക്കം പുനഃപരിശോധിക്കണമെന്ന് മാർത്തോമ്മാ ഡെവലപ്മെന്റ് ഡിപ്പാർട്ട്മെന്റ് (വികസന സംഘം) കോട്ടയം–കൊച്ചി ഭദ്രാസന വാർഷിക പൊതുയോഗം ആവശ്യപ്പെട്ടു.

എഫ്‌സിആർഎ ഭേദഗതി ബില്ലും അതുമായി ബന്ധപ്പെട്ട പുതിയ ചട്ടങ്ങളും പൂർണമായി പിൻവലിക്കണമെന്നും യോഗം പ്രമേയത്തിലൂടെ ആവശ്യപ്പെട്ടു.

മാർത്തോമ്മാ ഡെവലപ്മെന്റ് ഡിപ്പാർട്ട്മെന്റ് കോട്ടയം–കൊച്ചി ഭദ്രാസന വൈസ് പ്രസിഡന്റ് റവ. സജീവ് തോമസിന്റെ അധ്യക്ഷതയിൽ ചേർന്ന സമ്മേളനം മാർത്തോമ്മാ സഭ കോട്ടയം–കൊച്ചി ഭദ്രാസന അധ്യക്ഷൻ അഭിവന്ദ്യ തോമസ് മാർ തീമഥെയോസ് എപ്പിസ്കോപ്പ ഉദ്ഘാടനം ചെയ്തു.

പാർശ്വവൽക്കരിക്കപ്പെട്ട ജനവിഭാഗങ്ങളുടെ വികസനം വർത്തമാനകാലത്തിന്റെ അനിവാര്യതയാണെന്നും യഥാർത്ഥ ക്രൈസ്തവ സാക്ഷ്യം അതാണെന്നും ഉദ്ഘാടന പ്രസംഗത്തിൽ അഭിവന്ദ്യ തോമസ് മാർ തീമഥെയോസ് എപ്പിസ്കോപ്പ പറഞ്ഞു.

മാർത്തോമ്മാ സഭ കോട്ടയം–കൊച്ചി ഭദ്രാസന വികാരി ജനറൽ വെരി. റവ. ഡോ. സാംസൺ എം. ജേക്കബ് മുഖ്യപ്രഭാഷണം നടത്തി.

ഭദ്രാസന സെക്രട്ടറി കുരുവിള മാത്യൂസ്, ട്രഷറർ കോരാ കുര്യൻ, കേന്ദ്ര മാനേജിംഗ് കമ്മിറ്റി അംഗങ്ങളായ ജോസി കുര്യൻ, എം. എസ്. റോയ്, കേന്ദ്ര ജനറൽ കൗൺസിൽ അംഗങ്ങളായ രാജു എബ്രഹാം വെണ്ണിക്കുളം, ഷിബു ജി. ഐപ്പ്, പി. കെ. തോമസ് പ്ലാച്ചിറ, ബിജു നൈനാൻ മരുതുക്കുന്നേൽ, മാത്യൂസ് പൊയ്കയിൽ, കോശി പി. സക്കറിയ, വാളകം ജോൺ, റിച്ചു ജോൺ ചിറയിൽ, അഡ്വ. എബ്രഹാം പി. തോമസ്, അജീഷ് എബ്രഹാം എന്നിവർ പ്രസംഗിച്ചു.

യോഗത്തിൽ ഭദ്രാസന സെക്രട്ടറി വാർഷിക റിപ്പോർട്ടും ഭദ്രാസന ട്രഷറർ വാർഷിക വരവ്-ചെലവ് കണക്കും ബജറ്റും അവതരിപ്പിച്ചു.