ഇടുക്കി: ജില്ലയിൽ തുടരുന്ന ശക്തമായ മഴയെ തുടർന്ന് പാംബ്ല (ലോവർ പെരിയാർ) അണക്കെട്ടിലെ ജലനിരപ്പ് ഉയർന്ന സാഹചര്യത്തിൽ ഇന്ന് രാത്രി അണക്കെട്ടിന്റെ ഷട്ടർ ഉയർത്താൻ തീരുമാനിച്ചു.

ജലനിരപ്പ് സുരക്ഷിതമായി ക്രമീകരിക്കുന്നതിനായാണ് ഷട്ടർ ഉയർത്തുന്നത്. ഇതോടെ അണക്കെട്ടിൽ നിന്ന് വെള്ളം പുറത്തേക്ക് ഒഴുക്കിവിടുന്നതിനാൽ പെരിയാർ നദിയുടെ ഇരുകരകളിലും താമസിക്കുന്നവർ അതീവ ജാഗ്രത പാലിക്കണമെന്ന് ജില്ലാ ഭരണകൂടവും കെഎസ്ഇബിയും മുന്നറിയിപ്പ് നൽകി.

നദിയിലിറങ്ങൽ, മത്സ്യബന്ധനം, കുളിക്കൽ, മറ്റ് അപകടസാധ്യതയുള്ള പ്രവർത്തനങ്ങൾ എന്നിവ പൂർണമായും ഒഴിവാക്കണമെന്നും അധികൃതർ നിർദേശിച്ചു.

അതേസമയം, സംസ്ഥാനത്ത് അടുത്ത ദിവസങ്ങളിലും ശക്തമായ മഴ തുടരുമെന്നാണ് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. അതിനാൽ പൊതുജനങ്ങൾ ഔദ്യോഗിക മുന്നറിയിപ്പുകൾ കർശനമായി പാലിക്കണമെന്നും അധികൃതർ അഭ്യർഥിച്ചു.