രാജാമുടി മേഖലയിലെ രൂക്ഷമായ കാട്ടാനശല്യത്തെ തുടർന്ന് പ്രദേശം സന്ദർശിച്ചതായി അഡ്വ. സിറിയക് തോമസ് എം.എൽ.എ അറിയിച്ചു. കാട്ടാനക്കൂട്ടം നിരവധി കർഷകരുടെ മാസങ്ങളുടെ അധ്വാനഫലമായ കൃഷി നശിപ്പിച്ചെന്നും പ്രദേശവാസികളുടെ ജീവനും സ്വത്തിനും ഭീഷണി നിലനിൽക്കുന്നതായും അദ്ദേഹം ഫേസ്ബുക്ക് പോസ്റ്റിൽ വ്യക്തമാക്കി.

സംഭവത്തെ തുടർന്ന് വനംവകുപ്പ് ഉദ്യോഗസ്ഥരുമായി ഫോണിൽ ബന്ധപ്പെടുകയും രാജാമുടി കേന്ദ്രീകരിച്ച് നിരീക്ഷണവും പട്രോളിംഗും ശക്തമാക്കാൻ നിർദേശം നൽകിയതായും എം.എൽ.എ അറിയിച്ചു.

പ്രദേശത്ത് സൗരവേലി സ്ഥാപിക്കുന്നത് ഉൾപ്പെടെയുള്ള ശാശ്വത പരിഹാര നടപടികൾ അടിയന്തരമായി നടപ്പാക്കണമെന്ന് ആവശ്യപ്പെട്ട് അടുത്ത ദിവസങ്ങളിൽ വനംവകുപ്പ് മന്ത്രിയെ നേരിൽ കാണുമെന്നും അദ്ദേഹം അറിയിച്ചു.

ജനങ്ങളുടെ ജീവനും സ്വത്തിനും സംരക്ഷണം ഉറപ്പാക്കാൻ വന്യജീവി ആക്രമണം തടയുന്നതിനുള്ള ദീർഘകാല പദ്ധതികൾ സർക്കാർ നടപ്പാക്കേണ്ടത് അനിവാര്യമാണെന്നും എം.എൽ.എ അഭിപ്രായപ്പെട്ടു.