പാലാ: റെഡ് അലർട്ട് പ്രഖ്യാപിച്ചിരിക്കുന്ന പാലാ മേഖലയിൽ തുടർച്ചയായി കനത്ത മഴ പെയ്യുന്നു. കഴിഞ്ഞ ഏതാനും മണിക്കൂറുകളായി ശക്തമായ മഴ തുടരുന്നതിനാൽ ജനങ്ങൾ ആശങ്കയിലാണ്.

റെഡ് അലർട്ടിന്റെ പശ്ചാത്തലത്തിൽ ഇന്ന് (ഓഗസ്റ്റ് 7) കോട്ടയം ജില്ലയിലെ വിദ്യാഭ്യാസ സ്ഥാപനങ്ങൾക്ക് ജില്ലാ ഭരണകൂടം അവധി പ്രഖ്യാപിച്ചിട്ടുണ്ട്.

മഴയുടെ തീവ്രത കുറയാത്ത സാഹചര്യത്തിൽ താഴ്ന്ന പ്രദേശങ്ങളിൽ വെള്ളക്കെട്ടിനും പെട്ടെന്നുള്ള ജലനിരപ്പ് ഉയരാനുമുള്ള സാധ്യത കണക്കിലെടുത്ത് ജനങ്ങൾ ജാഗ്രത പാലിക്കണമെന്ന് അധികൃതർ നിർദേശിച്ചു.

വെള്ളം പെട്ടെന്ന് ഉയർന്നാൽ റോഡ് ഗതാഗതം തടസ്സപ്പെടുമോയെന്ന ആശങ്കയും നിലനിൽക്കുന്നു. ജോലിക്കായി വീടുവിട്ട് പോയവർ സുരക്ഷിതമായി മടങ്ങിയെത്തുമോയെന്ന ആശങ്കയിൽ നിരവധി കുടുംബങ്ങൾ കാത്തിരിക്കുകയാണ്. അനാവശ്യ യാത്രകൾ ഒഴിവാക്കാനും ഔദ്യോഗിക മുന്നറിയിപ്പുകൾ കർശനമായി പാലിക്കാനും പൊതുജനങ്ങളോട് അഭ്യർഥിച്ചിട്ടുണ്ട്.