ചിങ്ങമാസം പിറക്കുന്നതോടെ ഗുരുവായൂരിൽ വിവാഹത്തിരക്ക് വർധിക്കുന്നു. ചിങ്ങമാസത്തിലെ ആദ്യ ഞായറാഴ്ചയായ ഓഗസ്റ്റ് 23-ന് ഗുരുവായൂർ ക്ഷേത്രത്തിൽ ഇതുവരെ 392 വിവാഹങ്ങളാണ് ബുക്ക് ചെയ്തിരിക്കുന്നത്.

വിവാഹം ബുക്ക് ചെയ്യാനുള്ള അവസരം ഓഗസ്റ്റ് 23 വരെ ലഭ്യമായതിനാൽ എണ്ണം 400 കടന്നേക്കുമെന്നാണ് ദേവസ്വം വൃത്തങ്ങൾ സൂചിപ്പിക്കുന്നത്. 2024 സെപ്റ്റംബർ 8-ന് നടന്ന 334 വിവാഹങ്ങളാണ് ഇതുവരെ ഗുരുവായൂരിലെ ഒരു ദിവസത്തെ റെക്കോർഡ്.

വിവാഹ ബുക്കിങ്ങുകളുടെ എണ്ണം ഉയർന്ന സാഹചര്യത്തിൽ നിലവിലുള്ള നാല് വിവാഹ മണ്ഡപങ്ങൾക്ക് പുറമെ അഞ്ച് മണ്ഡപങ്ങൾ കൂടി സജ്ജമാക്കാനുള്ള ഒരുക്കത്തിലാണ് ഗുരുവായൂർ ദേവസ്വം. തിരക്ക് നിയന്ത്രിക്കുന്നതിനും വിവാഹ ചടങ്ങുകൾ സുഗമമായി നടത്തുന്നതിനുമുള്ള ക്രമീകരണങ്ങളും ദേവസ്വം ഏർപ്പെടുത്തും.