അണക്കര: ഈ ഓണക്കാലത്തെ സംഗീതസാന്ദ്രമാക്കാൻ ‘ഓർമ്മകളിൽ ഒരു ഓണം’ എന്ന ഓണ ആൽബം ഒരുങ്ങുന്നു. ഫ്രണ്ട്സ് മീഡിയയുടെ ബാനറിൽ നിർമ്മിക്കുന്ന ആൽബത്തിന്റെ ചിത്രീകരണം അണക്കരയിൽ പുരോഗമിക്കുകയാണ്.

രാജേഷ് കോട്ടപ്പടി സംവിധാനം ചെയ്യുന്ന ആൽബത്തിൽ അനീഷ് മങ്ങാരം നായകനായും അഞ്ജന എസ്. നായർ നായികയായും എത്തുന്നു. ഓണത്തിന്റെ ഗൃഹാതുരമായ ഓർമ്മകളും കുടുംബബന്ധങ്ങളുടെ ഊഷ്മളതയും ആഘോഷനിമിഷങ്ങളും സംഗീതത്തിന്റെയും ദൃശ്യങ്ങളുടെയും സഹായത്തോടെ അവതരിപ്പിക്കുന്നതാണ് ആൽബം.

സലിം കോട്ടപ്പടിയാണ് സംഗീതം ഒരുക്കുന്നത്. ഷൈൻ കുമാർ പെരുമ്പാവൂരും അഞ്ചു അജേഷും ചേർന്നാണ് ഗാനങ്ങൾ ആലപിച്ചിരിക്കുന്നത്. ഷെട്ടി മണി ക്യാമറ കൈകാര്യം ചെയ്യുന്നു. സുധീർ മൂവാറ്റുപുഴ പ്രൊഡക്ഷൻ കൺട്രോളറാണ്. ജയരാജ് കോതമംഗലമാണ് ഓർക്കസ്ട്ര ഒരുക്കുന്നത്.

ഓണത്തിന്റെ നാടൻ സൗന്ദര്യവും മലയാളിയുടെ ഗൃഹാതുരമായ ഓർമ്മകളും മനോഹരമായ സംഗീതത്തിലൂടെ പ്രേക്ഷകരിലേക്ക് എത്തിക്കുകയാണ് ‘ഓർമ്മകളിൽ ഒരു ഓണം’ ലക്ഷ്യമിടുന്നത്. ഓണക്കാലത്ത് പ്രേക്ഷകരുടെ ഹൃദയത്തിൽ ഇടം നേടാനുള്ള ഒരുക്കത്തിലാണ് ആൽബത്തിന്റെ അണിയറ പ്രവർത്തകർ.