ഓണം പടിവാതിൽക്കൽ എത്തിനിൽക്കെ സംസ്ഥാനത്ത് പഞ്ചസാരവില കുതിച്ചുയരുന്നു. കഴിഞ്ഞ ദിവസങ്ങളിൽ റീട്ടെയിൽ വിപണിയിൽ പഞ്ചസാരയുടെ വിലയിൽ തുടർച്ചയായ വർധനയാണ് രേഖപ്പെടുത്തുന്നത്. ചിലയിടങ്ങളിൽ കിലോയ്ക്ക് ₹60 കടന്ന വില ഇപ്പോൾ ₹65ലെത്തിയിരിക്കുകയാണ്. വിലക്കയറ്റം തുടർന്നാൽ കിലോയ്ക്ക് ₹70 ന് മുകളിലേക്ക്  എത്തുമെന്ന ആശങ്കയും വ്യാപാരരംഗത്ത് ശക്തമാണ്.

കഴിഞ്ഞ ദിവസം കിലോയ്ക്ക് 61 രൂപ ആയിരുന്ന പഞ്ചസാരയ്ക്ക് ഇന്ന് 65 കടന്നിരിക്കുന്നു.അടുത്ത ദിവസങ്ങളിൽ വില വീണ്ടും ഉയരാനുള്ള സൂചനകളാണ് ലഭിക്കുന്നത്. അതേസമയം, വിപണിയിലെ ഓരോ സ്ഥാപനത്തിലെയും ബ്രാൻഡ്, ഗുണനിലവാരം, വാങ്ങൽവില എന്നിവ അനുസരിച്ച് റീട്ടെയിൽ വിലയിൽ വീണ്ടും വ്യത്യാസമുണ്ടാകാം.

രാജ്യത്ത് പഞ്ചസാരവില കഴിഞ്ഞ രണ്ട് മാസത്തിനിടെ ഏകദേശം 40 ശതമാനം വരെ ഉയർന്നതായാണ് റിപ്പോർട്ടുകൾ. പ്രതീക്ഷിച്ചതിലും കുറഞ്ഞ ആഭ്യന്തര ഉൽപ്പാദനം, കരിമ്പുകൃഷിയെ ബാധിച്ച കാലാവസ്ഥാ പ്രശ്നങ്ങൾ, രോഗബാധ, ഉത്സവ സീസണിലെ വർധിച്ച ആവശ്യകത, ആഗോള വിപണിയിലെ ലഭ്യതക്കുറവ് തുടങ്ങിയവയാണ് വില ഉയരാനുള്ള പ്രധാന കാരണങ്ങളായി കേന്ദ്ര സർക്കാർ ചൂണ്ടിക്കാട്ടുന്നത്.

ഓണം, ഗണേശോത്സവം, ദസറ, ദീപാവലി തുടങ്ങിയ ആഘോഷങ്ങൾ മുന്നിലെത്തിയതോടെ മധുരപലഹാരങ്ങൾക്കും ബേക്കറി ഉൽപ്പന്നങ്ങൾക്കും പഞ്ചസാരയുടെ ആവശ്യകത ഉയരുകയാണ്. ഓഗസ്റ്റ് മുതൽ നവംബർ വരെയുള്ള കാലയളവിൽ രാജ്യത്ത് പഞ്ചസാര ഉപഭോഗം സാധാരണയായി വർധിക്കുന്നതായും വിപണി വിദഗ്ധർ ചൂണ്ടിക്കാട്ടുന്നു.

വിലക്കയറ്റം പിടിച്ചുനിർത്താൻ കേന്ദ്ര സർക്കാർ 10 ലക്ഷം മെട്രിക് ടൺ അസംസ്കൃത പഞ്ചസാര തീരുവയില്ലാതെ ഇറക്കുമതി ചെയ്യാൻ അനുമതി നൽകിയിട്ടുണ്ട്. ഒക്ടോബർ 31 വരെയാണ് ഇറക്കുമതിക്ക് അനുമതി. വിപണിയിലെ ലഭ്യത വർധിപ്പിച്ച് വില നിയന്ത്രിക്കുകയാണ് ലക്ഷ്യം.

ഇതിനുപുറമെ, പഞ്ചസാരയുടെ സംഭരണം നിയന്ത്രിക്കുന്നതിനുള്ള നടപടികളും കേന്ദ്രം സ്വീകരിച്ചിട്ടുണ്ട്. സെപ്റ്റംബർ 1 മുതൽ നവംബർ 30 വരെ പ്രതിമാസം 10 മെട്രിക് ടണ്ണിലധികം പഞ്ചസാര ഉപയോഗിക്കുന്ന ബൾക്ക് ഉപഭോക്താക്കൾക്ക് 15 ദിവസത്തെ സ്റ്റോക്ക് മാത്രമേ കൈവശം വയ്ക്കാനാകൂ. വ്യാപാരികൾക്ക് 30 ദിവസത്തെ സ്റ്റോക്ക് പരിധിയും ഏർപ്പെടുത്തിയിട്ടുണ്ട്.

പഞ്ചസാരവിലയിലെ വർധന ഓണക്കാല കുടുംബബജറ്റിനും മധുരപലഹാര നിർമാതാക്കൾക്കും ബേക്കറി മേഖലയ്ക്കും അധികഭാരമാകുകയാണ്. പഞ്ചസാരയുടെ വില ഇനിയും ഉയർന്നാൽ മധുരപലഹാരങ്ങളുടെയും മറ്റ് പഞ്ചസാര അധിഷ്ഠിത ഉൽപ്പന്നങ്ങളുടെയും വിലയിലും വർധനയുണ്ടാകുമെന്ന ആശങ്കയുണ്ട്.

ഓണവിപണിയിൽ പഞ്ചസാരയുടെ വിലക്കയറ്റം ഉപഭോക്താക്കൾക്ക് പുതിയ തലവേദനയാകുകയാണ്.