വണ്ടിപ്പെരിയാർ: നഷ്ടപ്പെട്ട മൊബൈൽ ഫോൺ പരാതി ലഭിച്ച് വെറും 15 മിനിറ്റിനകം കണ്ടെത്തി ഉടമയ്ക്ക് കൈമാറി വണ്ടിപ്പെരിയാർ പോലീസ്. പുതുവൽ സ്വദേശിനി അഷ്‌മ തമ്പാന്റെ നഷ്ടപ്പെട്ട ഫോണാണ് പോലീസ് അതിവേഗം കണ്ടെത്തിയത്.

ഫോൺ നഷ്ടപ്പെട്ടതിനെ തുടർന്ന് അഷ്‌മ നൽകിയ പരാതിയുടെ അടിസ്ഥാനത്തിൽ വണ്ടിപ്പെരിയാർ പോലീസ് സബ് ഇൻസ്‌പെക്ടർ ജയ് ജോൺ നടത്തിയ അന്വേഷണത്തിലാണ് വണ്ടിപ്പെരിയാർ ടൗണിന് സമീപത്തുനിന്ന് ഫോൺ കണ്ടെത്തിയത്. തുടർന്ന് ഫോൺ ഉടമയ്ക്ക് കൈമാറുകയായിരുന്നു.

മൊബൈൽ ഫോൺ നഷ്ടപ്പെട്ടാൽ ഉടൻ ചെയ്യേണ്ടത്

ഫോൺ നഷ്ടപ്പെട്ടാൽ പരിഭ്രാന്തരാകാതെ എത്രയും വേഗം പോലീസിൽ പരാതി നൽകുകയാണ് ആദ്യം ചെയ്യേണ്ടത്. കേരള പോലീസിന്റെ പോൽ-ആപ്പ്, തുണ വെബ് പോർട്ടൽ എന്നിവ വഴിയോ സമീപത്തെ പോലീസ് സ്റ്റേഷനിൽ നേരിട്ടോ പരാതി നൽകാം. പരാതിയിൽ ഫോണിന്റെ IMEI നമ്പർ കൃത്യമായി രേഖപ്പെടുത്തണം.

സിം കാർഡ് ബ്ലോക്ക് ചെയ്യുക: ഫോൺ നമ്പർ ദുരുപയോഗം ചെയ്യുന്നത് തടയുന്നതിനായി മൊബൈൽ സേവനദാതാവുമായി ബന്ധപ്പെട്ട് ഡ്യൂപ്ലിക്കേറ്റ് സിം കാർഡ് എടുക്കണം. നഷ്ടപ്പെട്ട ഫോൺ ബ്ലോക്ക് ചെയ്യുന്നതിനും ഈ നമ്പർ ആവശ്യമായി വരും.

CEIR വഴി ഫോൺ ബ്ലോക്ക് ചെയ്യാം: www.ceir.gov.in എന്ന കേന്ദ്രസർക്കാർ സംവിധാനത്തിലൂടെ നഷ്ടപ്പെട്ടതോ മോഷണം പോയതോ ആയ മൊബൈൽ ഫോൺ ബ്ലോക്ക് ചെയ്യാം. Block Stolen/Lost Mobile എന്ന ഓപ്ഷൻ വഴി പോലീസ് പരാതിയുടെ പകർപ്പ്, തിരിച്ചറിയൽ രേഖ, ഫോൺ വാങ്ങിയതിന്റെ ഇൻവോയ്സ് തുടങ്ങിയ രേഖകൾ സഹിതം അപേക്ഷ നൽകാം.

IMEI നമ്പർ ബ്ലോക്ക് ചെയ്താൽ മറ്റൊരു സിം കാർഡ് ഉപയോഗിച്ചും ഫോണിൽ മൊബൈൽ നെറ്റ്‌വർക്ക് സേവനം ലഭ്യമാകില്ല. ഫോൺ ബ്ലോക്ക് ചെയ്ത ശേഷവും പോലീസ് സംവിധാനത്തിലൂടെ അത് കണ്ടെത്തുന്നതിനുള്ള നടപടികൾ തുടരാൻ സാധിക്കും. അപേക്ഷ സമർപ്പിച്ചാൽ ലഭിക്കുന്ന Request ID ഉപയോഗിച്ച് അപേക്ഷയുടെ നിലവിലെ സ്ഥിതിയും പരിശോധിക്കാം.

ഫോൺ തിരികെ ലഭിച്ചാൽ: CEIR പോർട്ടലിൽ തന്നെ ഫോൺ അൺബ്ലോക്ക് ചെയ്യുന്നതിനുള്ള സൗകര്യമുണ്ട്. Request ID ഉപയോഗിച്ച് അൺബ്ലോക്ക് ചെയ്യാനുള്ള അപേക്ഷ നൽകാം. തുടർന്ന് ഫോണിൽ സിം കാർഡ് ഉപയോഗിക്കാം.

സ്വകാര്യ വിവരങ്ങൾ സുരക്ഷിതമാക്കാം

നഷ്ടപ്പെട്ട സ്മാർട്ട്‌ഫോണിൽ സ്വകാര്യ വിവരങ്ങൾ ഉണ്ടെങ്കിൽ, മറ്റൊരു ഉപകരണത്തിലൂടെ Google Find Hub സേവനം ഉപയോഗിച്ച് ഫോൺ കണ്ടെത്താനും റിങ് ചെയ്യിക്കാനും ലോക്ക് ചെയ്യാനും സാധിക്കും. ആവശ്യമെങ്കിൽ Erase Device ഓപ്ഷൻ ഉപയോഗിച്ച് ഫോണിലെ വിവരങ്ങൾ നീക്കം ചെയ്യാനും കഴിയും. ഇതിനായി നഷ്ടപ്പെട്ട ഫോണിൽ ഉപയോഗിച്ചിരുന്ന Google അക്കൗണ്ടിൽ സൈൻ ഇൻ ചെയ്തിരിക്കണം.

മൊബൈൽ ഫോൺ നഷ്ടപ്പെട്ടാൽ വൈകാതെ പരാതി നൽകുകയും IMEI നമ്പർ കൈവശം സൂക്ഷിക്കുകയും ചെയ്യുന്നത് ഫോൺ വീണ്ടെടുക്കുന്നതിനുള്ള നടപടികൾക്ക് ഏറെ സഹായകരമാണ്.