ഏലപ്പാറ ചെമ്മണ്ണ് വാർഡിൽ വർഷങ്ങളായി നിലനിൽക്കുന്ന മുപ്പതോളം കുടുംബങ്ങളുടെ ഭൂപ്രശ്‌നങ്ങൾക്ക് ശാശ്വത പരിഹാരം കാണുന്നതിനായി ഇടപെടലുകൾ ശക്തമാക്കി. പീരുമേട് എം.എൽ.എ അഡ്വ. സിറിയക് തോമസിന്റെയും ഏലപ്പാറ പഞ്ചായത്ത് ഭരണസമിതിയുടെയും നേതൃത്വത്തിലാണ് നടപടികൾ പുരോഗമിക്കുന്നത്.

വിഷയം ശ്രദ്ധയിൽപ്പെടുത്തുന്നതിനായി എം.എൽ.എയും പഞ്ചായത്ത് ജനപ്രതിനിധികളും ചേർന്ന് കേരള മുഖ്യമന്ത്രി വി.ഡി. സതീശനെ നേരിൽ കണ്ട് നിവേദനം നൽകി. പ്രശ്‌നം വിശദമായി പരിശോധിച്ച് സാധ്യമായ എല്ലാ സഹായങ്ങളും ഉറപ്പാക്കുമെന്ന് മുഖ്യമന്ത്രി പ്രതിനിധി സംഘത്തിന് ഉറപ്പ് നൽകി.

കോടതി വ്യവഹാരങ്ങൾ നിലനിൽക്കുന്ന പ്രദേശത്ത് കഴിഞ്ഞ ദിവസങ്ങളിൽ കോടതി ഉത്തരവിന്റെ അടിസ്ഥാനത്തിൽ ചില കുടിയിറക്കൽ നടപടികൾ നടന്നിരുന്നു. ഇതേത്തുടർന്ന് ജനങ്ങളുടെ ആശങ്കകൾ നേരിട്ട് മനസ്സിലാക്കുന്നതിനായി അഡ്വ. സിറിയക് തോമസ് എം.എൽ.എയുടെയും പഞ്ചായത്ത് ഭരണസമിതിയുടെയും നേതൃത്വത്തിൽ ബാധിക്കപ്പെട്ട കുടുംബങ്ങളുടെ അടിയന്തര യോഗം ചേർന്നു.

കുടുംബങ്ങളുടെ ബുദ്ധിമുട്ടുകളും പരാതികളും നേരിട്ട് കേൾക്കുകയും രേഖപ്പെടുത്തുകയും ചെയ്തു. കോടതി ഉത്തരവുകളെ ബഹുമാനിച്ചുകൊണ്ട് തന്നെ, വർഷങ്ങളായി ദുരിതമനുഭവിക്കുന്ന കുടുംബങ്ങൾക്ക് ശാശ്വത പരിഹാരം കണ്ടെത്തുന്നതിനുള്ള ശ്രമങ്ങളാണ് നടത്തുന്നതെന്ന് എം.എൽ.എ അറിയിച്ചു.

എം.എൽ.എയോടൊപ്പം പഞ്ചായത്ത് ഭരണസമിതി അംഗങ്ങളായ ആർ. രഞ്ജിത്ത്, ജി. ജേക്കബ് എന്നിവരും സംഘത്തിലുണ്ടായിരുന്നു.