ഇടുക്കി: അതിശക്തമായ മഴയെ തുടർന്ന് ചിന്നക്കനാൽ പവർ ഹൗസ് വെള്ളച്ചാട്ടത്തിന് സമീപം നിർമാണത്തിലിരുന്ന ബഹുനില കെട്ടിടം ഭാഗികമായി ഇടിഞ്ഞുതാഴ്ന്നു. കെട്ടിടത്തിന്റെ അടിഭാഗത്തെ മണ്ണ് പൂർണമായും ഒലിച്ചുപോയതോടെയാണ് സംഭവം.

സംഭവത്തെ തുടർന്ന് സമീപത്ത് താമസിക്കുന്ന 15ഓളം കുടുംബങ്ങൾ ആശങ്കയിലാണ്. പ്രദേശത്ത് വീണ്ടും മണ്ണിടിച്ചിൽ ഉണ്ടാകാനുള്ള സാധ്യതയുള്ളതിനാൽ സുരക്ഷാ നടപടികൾ ശക്തമാക്കണമെന്നാണ് നാട്ടുകാരുടെ ആവശ്യം.

അതേസമയം, കുന്ന് ഇടിച്ചുനിരത്തിയും വലിയ തോതിൽ മണ്ണ് നീക്കം ചെയ്തുമാണ് കെട്ടിട നിർമാണം നടത്തിയതെന്ന ആരോപണവും ഉയരുന്നുണ്ട്. റെഡ് സോണിൽ ഉൾപ്പെടുന്ന പ്രദേശത്താണ് കെട്ടിടം നിർമിച്ചതെന്നും, അപകടസാധ്യതയുള്ള മേഖലയിൽ നിർമാണത്തിന് അനുമതി നൽകിയതാണ് ഇപ്പോഴത്തെ അവസ്ഥയ്ക്ക് കാരണമെന്നുമാണ് പ്രദേശവാസികളുടെ വിമർശനം.

സംഭവത്തിൽ സമഗ്ര അന്വേഷണം നടത്തി നിർമാണത്തിന് നൽകിയ അനുമതിയും സുരക്ഷാ മാനദണ്ഡങ്ങളും പരിശോധിക്കണമെന്നും, സമീപവാസികളുടെ സുരക്ഷ ഉറപ്പാക്കാൻ അടിയന്തര നടപടികൾ സ്വീകരിക്കണമെന്നും നാട്ടുകാർ ആവശ്യപ്പെട്ടു.