ഇടുക്കി: കല, കായികം, സാഹിത്യം, ശാസ്ത്രം, സാമൂഹിക പ്രവർത്തനം, പരിസ്ഥിതി സംരക്ഷണം, ഐ.ടി., കൃഷി, മാലിന്യ സംസ്കരണം, ജീവകാരുണ്യ പ്രവർത്തനം, ക്രാഫ്റ്റ്, ശിൽപ്പനിർമാണം, അസാമാന്യ ധൈര്യം തുടങ്ങിയ മേഖലകളിൽ 2025 ജനുവരി 1 മുതൽ ഡിസംബർ വരെ അസാധാരണ കഴിവ് പ്രകടിപ്പിച്ച 6 മുതൽ 18 വയസ് വരെയുള്ള കുട്ടികളിൽ നിന്ന് ഉജ്ജ്വല ബാല്യം പുരസ്‌കാരം 2025-ന് അപേക്ഷ ക്ഷണിച്ചു.

അപേക്ഷയോടൊപ്പം ബന്ധപ്പെട്ട സർട്ടിഫിക്കറ്റുകൾ, പ്രശസ്തിപത്രങ്ങൾ, കുട്ടിയുടെ പേരിൽ പ്രസിദ്ധീകരിച്ച പുസ്തകത്തിന്റെ പകർപ്പ് (ഉണ്ടെങ്കിൽ), കലാപ്രകടനങ്ങൾ ഉൾപ്പെടുത്തിയ സി.ഡി./പെൻഡ്രൈവ്, പത്രവാർത്തകളുടെ പകർപ്പുകൾ എന്നിവ സമർപ്പിക്കണം.

കേന്ദ്ര സർക്കാരിന്റെ നാഷണൽ ചൈൽഡ് അവാർഡ് ഫോർ എക്സെപ്ഷണൽ അച്ചീവ്‌മെന്റ് നേടിയ കുട്ടികളെ ഈ പുരസ്‌കാരത്തിന് പരിഗണിക്കില്ല. ഓരോ ജില്ലയിൽ നിന്നും നാല് കുട്ടികൾക്കാണ് പുരസ്‌കാരം നൽകുക. വിജയികൾക്ക് ₹25,000, സർട്ടിഫിക്കറ്റ്, ട്രോഫി എന്നിവ ലഭിക്കും. 6–11 വയസ്സ്, 12–18 വയസ്സ് എന്നീ രണ്ട് വിഭാഗങ്ങളിലായാണ് പുരസ്‌കാരം നൽകുന്നത്. ഭിന്നശേഷിക്കാരായ കുട്ടികൾക്കായി പ്രത്യേക വിഭാഗവും ഉണ്ടായിരിക്കും.

അപേക്ഷകൾ ജില്ലാ ശിശു സംരക്ഷണ ഓഫീസർ, ജില്ലാ ശിശു സംരക്ഷണ യൂണിറ്റ്, പൈനാവ് പി.ഒ., ഇടുക്കി – 685603 എന്ന വിലാസത്തിൽ സെപ്റ്റംബർ 10-നകം ലഭിക്കത്തക്ക വിധം അയയ്ക്കണം.

കൂടുതൽ വിവരങ്ങൾക്ക്: 04862 235532, 6282406053, 9744167198.

വെബ്സൈറ്റ്: www.wcd.kerala.gov.in⁠�.