കൊച്ചി: താരസംഘടനയായ അമ്മ'യിൽ ശ്വേതാ മേനോന്റെ നേതൃത്വത്തിൽ നടക്കുന്ന ഓണക്കിറ്റ് വിതരണത്തെ ചൊല്ലി പുതിയ വിവാദം. ജനറൽ ബോഡിയിൽ രാജി സമർപ്പിച്ച കമ്മിറ്റിക്ക് സംഘടനയുടെ പേരിൽ പ്രവർത്തനം നടത്താൻ അധികാരമില്ലെന്ന് ചൂണ്ടിക്കാട്ടി ഒരു വിഭാഗം താരങ്ങൾ രംഗത്തെത്തി.

ഇതേ തുടർന്ന് ഭൂരിഭാഗം അംഗങ്ങളും ഓണക്കിറ്റ് സ്വീകരിക്കാൻ തയ്യാറായില്ലെന്നാണ് വിവരം. രമേഷ് പിഷാരടിയുടെ നേതൃത്വത്തിലുള്ള കമ്മിറ്റിക്ക് തുടരാനാകില്ലെന്ന് മാത്രമാണ് കോടതി ഉത്തരവെന്നും നിലവിൽ രാജിവെച്ച കമ്മിറ്റി സംഘടനയുടെ പേരിൽ പ്രവർത്തിക്കുന്നത് ശരിയല്ലെന്നുമാണ് വിമർശകരുടെ നിലപാട്.

അതേസമയം, സംഘടനയുടെ പ്രവർത്തനങ്ങൾ വീണ്ടും സജീവമാക്കാനുള്ള ശ്രമങ്ങളുമായി ശ്വേതാ മേനോൻ നേതൃത്വം നൽകുന്ന കമ്മിറ്റി മുന്നോട്ടുപോകുന്നതിനിടെയാണ് ഓണക്കിറ്റ് വിതരണവുമായി ബന്ധപ്പെട്ട വിവാദം കൂടുതൽ ശക്തമായിരിക്കുന്നത്.