ജനവാസ മേഖലയിൽ കാട്ടാനക്കൂട്ടം; പട്രോളിങ് ശക്തമാക്കി വനംവകുപ്പ്
Reporter | Kerala Journal 
പീരുമേട്: ജനവാസ മേഖലകളിലിറങ്ങി ഭീതി പരത്തുന്ന കാട്ടാനക്കൂട്ടത്തെ ഉൾവനത്തിലേക്ക് തിരിച്ചയക്കുന്നതിനായി വനംവകുപ്പ് പട്രോളിങ് ശക്തമാക്കി. അഡ്വ. സിറിയക് തോമസ് എംഎൽഎയുടെ അധ്യക്ഷതയിൽ ചേർന്ന യോഗത്തിലാണ് പട്രോളിങ് ശക്തിപ്പെടുത്താൻ തീരുമാനിച്ചത്.
ഇതനുസരിച്ച് പട്ടുമല, ചൂളപ്പിരട്ട്, രാജമുടി വക്കീൽക്കാട് എന്നീ മൂന്ന് കേന്ദ്രങ്ങളിൽ വനംവകുപ്പ് ഉദ്യോഗസ്ഥരുടെ നിരീക്ഷണവും പട്രോളിങ്ങും ശക്തമാക്കും.
കഴിഞ്ഞ ദിവസങ്ങളായി പട്ടുമല, പട്ടുമുടി, രാജമുടി, കല്ലാർ മേഖലകൾ കേന്ദ്രീകരിച്ച് മൂന്ന് കാട്ടാനകളാണ് നിലയുറപ്പിച്ചിരിക്കുന്നത്. കൃഷികൾ നശിപ്പിക്കുകയും കയ്യാലകൾ തകർക്കുകയും ചെയ്ത ആനകൾ നാട്ടുകാരിൽ വലിയ ആശങ്കയാണ് സൃഷ്ടിക്കുന്നത്.
